Վրացական «Կվիրիս Պալիտրա» թերթի փոխանցմամբ` ամերիկացի գործարար Էնդրյու Մուրձան և այդ երկրում բնակվող վրացի ներգաղթյալ Դավիթ Կարտոզիան վրացական իշխանություններին մեղադրել են Սև ծովի ափին Լազիկա քաղաքի կառուցման գաղափարը գողանալու մեջ:
Ամերիկացի գործարարի խոսքերով՝ նախագծի վրա տարվող համատեղ աշխատանքները մեկնարկել են 7 տարի առաջ, դրանց մասնակցել է 32 մարդ և ծախսվել է 11 միլիոն դոլար: Նա հավելել է, որ Վրաստանի կառավարությունը գողացել է այդ նախագիծը.
«Վրաստանի կառավարությունը ձեռք է բերել մեծ թշնամու՝ հանձինս ինձ: Ես վիրավորված եմ, սակայն այդ նվաստացումը չեմ հանդուրժի: Ողջ աշխարհը կտեսնի, թե ով է ղեկավարում Վրաստանը»:
Դավիթ Կարտոզիան իր հերթին հայտարարել է, որ 2010 թվականի դեկտեմբերին նախագիծը հանձնվել է տվյալ ժամանակ ԱՄՆ-ում Վրաստանի դեսպան Բատու Կուտելիային, որից հետո խոստացել էին արձագանքել, սակայն դա տեղի չունեցավ, իսկ ավելի ուշ Վրաստանի կառավարությունը յուրացրեց նախագիծը:
Գործարարը հավելել է, որ այս մասին իրազեկվել են ամերիկացի 5 սենատորներ, որոնց հետ էլ այդ հարցը մանրամասնորեն քննարկվելու է հունիսի կեսերին: Վրաստանի իշխանությունները դեռ չեն մեկնաբանել այս ամենը:
Հիշեցնենք, որ Վրաստանի նախագահ Միխեիլ Սաակաշվիլին Սև ծովի ափին Լազիկա քաղաքի կառուցման մասին ազդարարել է նախորդ տարվա դեկտեմբերի սկզբին՝ ընդգծելով, որ 10 տարի անց այն կունենա կես միլիոն բնակչություն և կզիջի միայն մայրաքաղաք Թբիլիսիին: