Երևանի քաղաքապետ Տարոն Մարգարյանը հանդիպել է Երևանը գրքի համաշխարհային մայրաքաղաք հռչակելու տոնակատարություններին մասնակցելու նպատակով Երևան ժամանած Բեյրութի քաղաքապետ Բիլալ Համադի հետ: Այս մասին «Առաջին լրատվական»-ին հայտնում են Երևանի քաղաքապետարանի տեղեկատվության և հասարակայնության հետ կապերի վարչությունից:
Ողջունելով գործընկերոջը` Տարոն Մարգարյանը, համառոտ ներկայացնելով Երևան քաղաքի կառավարման համակարգն ու առաջնահերթությունները, առանձնացրել է նաև քաղաքի համաչափ զարգացման կարևորությունն ու նշել, որ այդ ուղղությամբ արդեն իսկ ձեռնարկվել են որոշակի քայլեր, որոնց արդյունքները տեսանելի կլինեն ոչ ուշ ապագայում: «Կարծում եմ Երևանը և Բեյրութը համագործակցության լայն հնարավորություններ և հեռանկար ունեն ինչպես կառավարման հարցում փորձի փոխանակման, այնպես էլ քաղաքային տնտեսության տարբեր ոլորտներում: Մեր համագործակցությունն առավել առարկայական դարձնելու նպատակով պետք է աշխատանքային խումբ ստեղծենք, որը համակողմանիորեն կուսումնասիրի և հստակ առաջարկություններ կներկայացնի` նախանշելով համագործակցության զարգացման հստակ ուղղությունները»,- նշել է Տարոն Մարգարյանը` հատուկ կարևորելով նաև այն հանգամանքը, որ 2000 թվականից ի վեր Երևանը և Բեյրութը եղբայրացած քաղաքներ են:
Շնորհակալություն հայտնելով ջերմ ընդունելության համար, Բեյրութի քաղաքապետ Բիլալ Համադը, ընդգծելով բեյրութահայ համայնքի կարևոր դերն ու նշանակությունը Լիբանանի կյանքում, համոզմունք է հայտնել, որ առաջիկայում Երևանի և Բեյրութի միջև հարաբերություններն ավելի սերտ ու գործնական կդառնան. «Շատ կարևոր է մեր համագործակցությունը տարբեր խնդիրների շուրջ համատեղ լուծումներ գտնելու, այդ թվում նաև փորձի փոխանակման ուղղությամբ, հատկապես հաշվի առնելով, որ որոշ դեպքերում մեր երկու քաղաքների ոլորտային խնդիրները համանման են»,- նշել է Բիլալ Համադը և երկու քաղաքների փոխգործակցության ընդլայնման ու հարաբերությունների սերտացման հարցերն առավել հանգամանալի քննարկելու համար, օգտվելով առիթից, Տարոն Մարգարյանին հրավիրել է պաշտոնական այցով հյուրընկալվել Բեյրութում:
Հանդիպման ավարտին Տարոն Մարգարյանը մեկ անգամ ևս ընդգծել է, որ Երևանի քաղաքապետարանը բաց և պատրաստակամ է քննարկելու և իր լիազորությունների շրջանակում օժանդակելու Երևանում ներդրումային ծրագրերի իրականացմանը:
