Կոմունիստական կուսակցությունը Կապանում իր քարոզարշավն ուշացած սկսեց, քանի որ մայրաքաղաքից Սյունիք գալիս որոշ մարդկանց, ինչպես հետո պարզվեց՝ «Բարգավաճ Հայաստան» կուսակցույթյան ներկայացուցիչների կողմից, ճանապարհը ժամանակավորապես փակվել էր և անհնարին էր դարձել այդ հատվածով երթևեկելը:
Կոմունիստները Կապան հասան ժամը 18-ին, և հանդիպեցին մշակույթի հրապարակում հավաքված մոտ 50-60 տարեց կապանցիների հետ, ովքեր ժամը 5-ից սպասում էին իրենց նախընտրած կուսակցության առաջնորդին: Հայաստանի կոմունիստական կուսակցության կենտկոմի առաջին քարտուղար Ռուբեն Թովմասյանը ներկայացրեց իրենց կողմից առաջարկվող ծրագրերը, համեմատեց ներկայիս ու խորհրդային միության տարիների Հայաստանները, արձանագրեց այն վատ իրավիճակն ու ծանր պայմանները, որ տիրում է այսօրվա Հայաստանում և այն նվաճումները, որոնք այն տարիներին էին արձանագրվել: «Արդեն 22 տարի է՝ նույն դեմքերը, նույն մարդիկ, նույն ազգականներով, իրենց ազգուտակով Ազգային ժողովում են: Կային մարդիկ, որոնք կուսակցությունից կուսակցություն են թռնում, միայն թե անցողիկ տեղերում լինեն: Դրա համար կոմունիստներն իրենց ծրագրի մի կետում մտցրել են հետևյալ հարցը, որ ԱԺ-ի հեղինակությունը բարձրացնելու համար ժողովրդին իրավունք տրվի դեպուտատին հետ կանչելու, որովհետև ժողովուրդը դարձել է միայն ընտրող, նրանից հետո էլ իր պատգամավորի երեսը չի տեսնում կամ էլ վերջինս ժամանակ չունի ժողովրդի հետ հանդիպելու համար: Երկրի ամբողջ հարստությունը 10 մարդու ձեռքն է, իսկ մնացածը աղքատ են, ու աղքատությունը գնալով երիտասարդանում է: Մենք առաջարկում ենք ազգայնացնել բոլոր ռազմավարական ճյուղերը` հատկապես հանքարդյունաբերության ճյուղը, դրանք կենտրոնացնել պետության, ժողովրդի ձեռքում, որը կնպաստի գործազրկության և արտագաղթի իսպառ վերացմանը»,- իր ելույթում նշեց պարոն Թովմասյանը, ով հերթով անդրադարձավ բոլոր ոլորտներին` սկսած կրթությունից, մինչև առողջապահություն ու գյուղատնտեսություն, առաջարկեց փոփոխություններ մտցնել և բարելավել ժողովրդի ապրելակերպը:
Մեր զրուցակից , կապանցի Արաքսյա Նազարյանը հիշեց այն տարիները, երբ անգործ մարդ չկար, բոլորն աշխատնք ունեին, անվճար կրթություն ու բուժում էին ստանում, ապահովված էին բնակարաններով իսկ այսօր բարձրագույն կրթության տեր երիտասարդները թողնում–հեռանում են երկրից, ցանկացած աշխատանք անում արտերկրում՝ միայն թե գումար վաստակեն, ուղարկեն Հայաստանում ապրող իրենց ընտանիքներին:
Կոմունիստական կուսակցության ներկայացուցիչները վաղը կշարունակեն իր հանդիպումները Սյունիքի մարզոմ, նրանք կայցելեն Գորիս և Սիսիան:
