Ալյուրի թանկացման խնդրին անդրադառնալով՝ ԱԺ ՀՅԴ խմբակցության պատգամավոր Արծվիկ Մինասյանն ասաց, որ այն կախված է մի քանի գործոններից: Ըստ Մինասյանի՝ առանձին աճ են գրանցել ալյուրի հիմնական հումքերը, կա նաև արտաքին շուկայի ազդեցությունը: Սակայն Մինասյանի կարծիքով, ալյուրի և ընդհանրապես մյուս ապրանքների գնաճի վրա արտաքին ազդեցության չափերը չափազանցված են: Պատգամավորի գնահատմամբ, եթե կառավարությունը ցորենի ներմուծման քաղաքականությունը ճիշտ իրականացներ և մի քանի երկրից ներմուծեր, ապա այսօր ալյուրի գնաճ տեղի չէր ունենա: Բացի այդ, Մինասյանի կարծիքով, այս վիճակի պատճառն այն է, որ կառավարությունը անտարբերության է մատնել գյուղատնտեսությունը, այդ ոլորտի ֆինանսավորումը նվազել է:
ԲՀԿ-ական պատգամավոր Վարդան Բոստանջյանն էլ նկատեց, թե բոլորի համար էլ պարզ է, որ մեր տնտեսությունն ունի խոցելի տեղեր, բայց սա բնականոն գործընթաց է, պարզապես մենք ենք մաքսիմալիստ, ուզում ենք՝ ամեն ինչ արագ կարգավորվի:
Բոստանջյանի խոսքերով, ոչ ցանկալի գնաճային սցենարները կշարունակվեն. «Կառավարության գործիքակազմն, ասում են, բավարար չէ, բայց վստահ եմ, որ այլ գործիքակազմերով հնարավոր չէ ապահովել գնաճի կայունություն: Անհրաժեշտ է տնտեսական համալիր քաղաքականություն: Տնտեսական զարգացումները ենթադրում են բարեփոխումներ հարկային դաշտում»:
