ՌԱՀՀԿ փորձագետ Էդգար Վարդանյանը չի կարծում, որ Հայաստանի մասին Եվրախորհրդարանի զեկույցում ընդգծված դրույթը, որտեղ ազատ և արդար ընտրությունների անցկացումը որակվում է որպես «ծայրահեղ անհրաժեշտություն», կարող է իրապես ազդել, որ ընտրությունները հենց այդպիսին էլ լինեն: Նման տեսակետ փորձագետը հայտնեց «Առաջին լրատվական»-ի հետ զրույցում:
«Այս զգուշացումն ընդամենը կարող է նպաստել, որ իշխանություններն ակնհայտ խախտումներ թույլ չտան կամ քիչ թույլ տան: Այսինքն, իշխանությունները կաշխատեն ամեն կերպ քողարկել իրենց վերարտադրությունն ապահովող մեխանիզմները, որոնք հաճախ օրինական դաշտից դուրս են»,- նշեց Էդգար Վարդանյանը:
Հիշեցնենք, որ ապրիլի 18-ին, Եվրախորհրդարանը Հայաստանի վերաբերյալ նոր զեկույց է ընդունել, որտեղ ազատ և արդար ընտրությունների անցկացումը որակվում է որպես «ծայրահեղ անհրաժեշտություն», նշվում է նաև 2008 թվականի մարտի 1-ի դեպքերի թափանցիկ ու անկախ հետաքննությունն ավարտին հասցնելու, դատական համակարգը բարեփոխելու, քաղաքականությունը բիզնեսից տարանջատելու, ինչպես նաև՝ տնտեսության մեջ օլիգարխիկ համակարգը կազմաքանդելու կարևորությունը։
