Բոլոնիայի գործընթացին միանալով՝ ՀՀ կրթական համակարգը որդեգրեց կրեդիտային համակարգը և նախկին 5 բալանոց գնահատման համակարգը փոխարինվեց 20 կամ 100 բալանոցով: Եթե նախկինում ուսանողը բավարար ստանալու համար ուներ ընդամենը մեկ հնարավորություն, ապա այսօր բավարար են 8-12 միավորները, 100 բալանոցի դեպքում այդ հնարավորությունն ավելի լայն է: «Առաջին լրատվական»-ի հետ զրույցում նախկին ԿԳ նախարար Էդուարդ Ղազարյանը կարծիք հայտնեց, որ կրեդիտային համակարգը կրթության որակի առումով մեզ ոչինչ չի տալիս. «Մեզ հրամցնում են, որ գիտելիքի գնահատման այդ համակարգը նպաստում է մասնագետների պատրաստման որակի բարձրացմանը, սակայն, իմ կարծիքով, դրանք միմյանց հետ կապ չունեն: Գիտելիքի գնահատումը ոչ մի կերպ կապ չունի մասնագետների պատրաստման որակի հետ»:
Ղազարյանը ևս համակարծիք է, որ ներկայիս գնահատման համակարգն ավելի հեշտ է ուսանողների համար. «Այսօր քննությունը մաս-մաս մոդուլներով են հանձնում, և ինչ-որ միավորներ հավաքելով՝ արդեն բավարար գնահատական ունեն»:
Ղազարյանի խոսքերով, նախկին համակարգը մի դժվարություն ուներ` ամբողջը կուտակվում էր և պետք էր հանձնել հունվար կամ հունիս ամսին. «Ծավալը մեծ էր, և ուսանողների համար դժվար էր այդ ծավալի գիտելիքների պահանջը բավարարել»: