Ավստրալիական Jetstar ավիաընկերության օդաչուն մոռացել է բացել ինքնաթիռի անիվները` ստացված հաղորդագրության պատճառով: Նման եզրահանգման են եկել Սինգապուրի օդանավակայանի արտակարգ իրավիճակն ուսումնասիրած փորձագետները:
Պատահարը տեղի էր ունեցել 2007 թ. մայիսի 27-ին: A320 օդանավը դադարեցրել էր վայրէջքը` գտնվելով երկրից 150 մետր բարձրության վրա:
Պատահարն ուսումնասիրած հանձնաժողովի տեղեկատվության համաձայն` այն բանից հետո, երբ երկրորդ օդաչուն սկսել է վայրէջք կատարելու պատրաստությունները, օդանավի կապիտանի հեռախոսին հաղորդագրություններ են սկսել գալ, որի պատճառով օդաչուն շեղվել է և չի լսել դիսպետչերների ցուցումները:
Ինչպես հետագայում մեկնաբանել է կապիտանը, ինքը մոռացել է թռիչքից առաջ անջատել հեռախոսը և փորձել է դա անել վայրէջքի պահին: Մոտ 300 մ բարձրության վրա երկրորդ օդաչուն զգացել է, որ ինչ–որ բան այն չէ, սակայն չի կարողացել հասկանալ, թե ինչ է կատարվում: 220 մետր բարձրության վրա ազդանշանն անձնակազմին զգուշացրել է չբացված անիվների մասին:
Ուսումնասիրելով պատահարը` քննիչները եկել են այն եզրահանգման, որ 850 մ–ից 300 մ իջնելու ընթացքում ինքնաթիռի անձնակազմի անդամները չեն կատարել հրահանգով ամրագրված ոչ մի գործողություն: Երկրորդ օդաչուի սխալները մեկնաբանել են հոգնածությամբ:
Jetstar ընկերության ներկայացուցիչները հայտարարել են, որ դաս են քաղել պատահարից: Բարեբախտաբար, ինքնաթիռին հաջողվել է կրկնակի բարեհաջող վայրէջք կատարել: Անձնակազմի անդամների հանդեպ որևէ պատժամիջոցի մասին չի հաղորդվել:
