Իրանական Press TV-ի փոխանցմամբ՝ Իրանի ԱԳՆ-ի պաշտոնական ներկայացուցիչ Ռամին Մեհմանպարաստը Խորվաթիայում տեղի ունեցած մամուլի ասուլիսի ժամանակ «Վեցյակին» կոչ է արել խոսքից անցնել գործի:
Մեհմանպարաստը լավատեսություն է հայտնել մայիսին Բաղդադում կայանալիք Իրանի ու «Վեցյակի» միջև բանակցությունների հերթական փուլի անցկացման կապակցությամբ և «Վեցյակին» կոչ է արել անցնել գործնական քայլերին. «Մենք լավատեսորեն ենք նայում ապագային և ցանկանում ենք, որ հակառակ կողմը ձեռնարկի գործնական քայլեր:
Ստամբուլում տեղի ունեցած բանակցությունների նախորդ փուլն անցել է դրական մթնոլորտում, կողմերը պայմանավորվել են համագործակցել Միջուկային զենքի չտարածման մասին պայմանագրի հիման վրա: Վաշինգտոնը սակայն խախտում է այդ պայմանագրի դրույթները: Նա տիրում է աշխարհի ատոմային զենքի կեսին: Գոյություն ունեն այնպիսի երկրներ, որոնք անհրաժեշտության դեպքում սպառնում են միջուկային զենքի կիրառմամբ: ԱՄՆ-ն ու Ֆրանսիան այդ երկրների թվում են:
Արևմտյան երկրները, չպահպանելով Միջուկային զենքի չտարածման մասին պայմանագրի դրույթները, 200 միջուկային մարտագլխիկ են հատկացրել Իսրայելին: Իրանը չունի հետագայում միջուկային զենքի ստեղծման պլաններ: Իրանը մշտապես կոչ է արել հրաժարվել միջուկային զենքից»:
