Ինչպես հաղորդում է Al-Jazeera հեռուստաընկերությունը, Պաղեստինի ինքնավարության ղեկավարությունը 2008 թ. բանակցությունների ժամանակ պատրաստ էր Արևելյան Երուսաղեմի մեծ մասը հանձնել իսրայելական կողմին, սակայն իսրայելցիները հրաժարվել են:
Al-Jazeera-ի մեկնաբանությամբ, այս տեղեկությունները իրենք հրապարակել են` հիմնվելով ավելի քան հազար գաղտնի փաստաթղթերի վրա, որոնք հայտնվել են հեռուստաընկերության տրամադրության տակ: Հեռուստաընկերության հաղորդմամբ, այդ փաստաթղթերն իրենք արդեն փոխանցել են բրիտանական The Guardian թերթին:
Բացի այդ, սույն փաստաթղթերից հայտնի է դարձել նաև, որ պաղեստինցիները պատրաստ են եղել միջազգային ուժերի վերահսկողությանը հանձնել Տաճարի լեռը, որի վրա գտնվում է մուսուլմանների սրբավայր Ալ-Աքսա մզկիթը:
Ընդ որում, Պաղեստինի ղեկավարությունը համաձայնել է փախստականների թիվը սահմանափակել մինչև 100 հազար մարդ, որոնք պետք է վերադառնային իրենց բնակավայրեր, ընդ որում, դա պետք է լինի 10 տարվա ընթացքում:
Պաղեստինի իշխանությունների ներկայացուցիչ Սայեբ Էրիկաթը, որը այդ բանակցություններում մասնակցել է որպես Պաղեստինի պատվիրակության անդամ, հայտարարել է, որ Al-Jazeera-ի հրապարակումը կատարյալ սուտ է և չի հաստատել դրանց իսկությունը:
