20-ամյա ընդմիջումից հետո առաջին քուվեյթյան ինքնաթիռը վայրէջք է կատարել Իրաքի Ալ-Նաջաֆ քաղաքի օդանավակայանում: Ինչպես հաղորդում է ITAR-TASS-ը, չվերթն իրականացրել է Jazeera Airways մասնավոր ավիաընկերությունը, որի օդանավն այդ քաղաք է հասցրել 157 ուղևորի: Օդանավում եղել են նաև Բաղդադում և Էլ-Քուվեյթում երկու երկրների դեսպանները՝ Ալի Ալ-Մաոմենը և Մուհամմադ Բահր Ալ-Ուլյումը:
Ավելի վաղ Իրաքի իշխանությունները և քաղաքացիական ավիացիայի վարչությունը հավանություն էին տվել քուվեյթյան ավիաընկերության խնդրանքին՝ չվերթ իրականացնել երկու քաղաքների միջև: Առաջին փուլում Jazeera Airways-ի А320 ինքնաթիռները շաբաթական 4 անգամ կթռչեն Իրաքի մայրաքաղաք և նույնքան անգամ՝ Ալ-Նաջաֆ, որը գտնվում է Բաղդադից հարավ:
1990 թ. իրաքյան զորքերի կողմից Քուվեյթի գրավումից հետո երկու երկրների միջև օդային հաղորդակցությունը դադարեցվեց: Իրաքի վարչապետ Նուրի Ալ-Մալիքիի՝ մարտի կեսերին Քուվեյթ այցելության ժամանակ կողմերը համաձայնության եկան լուծել երկկողմ հարաբերությունների զարգացմանը խոչընդոտող այդ խնդիրը: Քուվեյթն Իրաքից պահանջում էր 1.2 մլրդ դոլար փոխհատուցում իրաքյան օկուպացիայի ժամանակ «գողացված» իր 10 քաղաքացիական ինքնաթիռների համար: Այցի ընթացքում այդ գումարը նվազեցվեց 500 մլն դոլարի: Ընդ որում դրա մի մասը կվճարվի կանխիկ, իսկ մյուս մասը Իրաքի կողմից կներդրվի քաղաքացիական ավիացիայի ոլորտում Քուվեյթի հետ համատեղ նախագծում:
