Որտե՞ղ են հայ երիտասարդները նախընտրում անցկացնել երեկոները: Այս հարցի պատասխանը փորձեցինք պարզել՝ այցելելով մի շարք ժամանցի վայրեր: Երիտասարդները լավ ժամանակ անցկացնելու համար հիմնականում հաճախում են կարաոկեներ, գարնան բացվելուն պես՝ նաև այգիներ և բացօթյա սրճարաններ, ինչպես նաև՝ բար-ակումբներ:
«Առաջին լրատվական»-ի հարցումների համաձայն՝ երիտասարդները նախընտրում են այգիներում վայելել բնության գեղեցկությունը, մաքուր օդ շնչել և ուղղակի հանգստանալ: Շատերը նախընտրում են աղմկոտ կարաոկեները՝ այն համարելով լիցքաթափվելու էժան և հետաքրքիր միջոց: Նշենք, որ Երևանի կարաոկեների հիմնական հաճախորդները 16-25 տարեկան երիտասարդներն են, մուտքն աղջիկների համար ազատ է, իսկ տղաներինն արժե հազար դրամ և միայն զույգերով:
Կարաոկեները հիմնականում աշխատում են երեկոյան ժամը 17-24-ը, կան նաև շուրջօրյա աշխատողներ: Այստեղ երիտասարդները կարող են ոչ միայն պարել, այլև՝ կատարել իրենց նախընտրած երգը:
Բացօթյա սրճարաններում երեկոյան ժամերին կարելի է հանդիպել հիմնականում երիտասարդների: «Առաջին լրատվական»-ը, խոսելով մի շարք երիտասարդների հետ, պարզեց, որ անգամ մեկ գավաթ սուրճը բավական է, որ երիտասարդները հավաքվեն որևէ սրճարանում, կազմակերպեն իրենց հանգիստը: Այսօր Երևանում կան տասնյակ բացօթյա սրճարաններ, որոնց հիմնական մասը գտնվում է Կենտրոն համայնքում:
Երիտասարդների կարելի է հանդիպել նաև բար-ակումբներում, որտեղ երեկոյան ժամերին կազմակերպվում են փակ միջոցառումներ: Տարբեր ակումբներում երեկոները հենց իրենք՝ երիտասարդներն են կազմակերպում իրենց հանգիստը, նվագում են, երգում և պարզապես զրուցում:
