Ապրիլի 16-ին կայացել է արտգործնախարար Էդվարդ Նալբանդյանի հանդիպումը պաշտոնական այցով Երևանում գտնվող Բելառուսի ԱԳ Սերգեյ Մարտինովի հետ: Աս մասին «Առաջին լրատվական»-ին հայտնում են ԱԳՆ մամլո գրասենյակից:
Ողջունելով հյուրին` նախարար Նալբանդյանը նշել է, որ երկու երկրների ղեկավարների ջանքերի շնորհիվ վերջին տարիներին հայ-բելառուսական հարաբերությունները զգալի զարգացում են ապրել համագործակցության տարբեր բնագավառներում: Նախարար Նալբանդյանն ընդգծել է, որ առկա են բոլոր նախադրյալներն երկկողմ հարաբերությունների առավել ամրապնդման համար, և վստահություն հայտնեց, որ կողմերը հավելյալ ջանքեր կգործադրեն այդ ուղղությամբ:
Նախարար Մարտինովը, շնորհակալություն հայտնելով Երևան այցելելու հրավերի համար, իր հերթին ևս գոհունակություն է հայտնել երկկողմ հարաբերությունների բարձր մակարդակի և դինամիկ զարգացող համագործակցության առնչությամբ:
Երկուստեք շեշտվել է, որ բարձր մակարդակի քաղաքական երկխոսությունը, փոխայցելությունները, խորհրդարանական կապերը, ապակենտրոնացված համագործակցությունը, տնտեսական փոխգործակցությունը, մշակութային փոխանակումները հնարավորություն են տալիս առավել խորացնել երկու ժողովուրդների միջև բարեկամությունը:
Նախարարներն անդրադարձան երկու երկրների ղեկավարների միջև ձեռք բերված պայմանավորվածությունների և նրանց կողմից տրված հանձնարարականների կատարման ընթացքին:
Հայաստանի և Բելառուսի արտգործնախարարները քննարկեել են երկկողմ, տարածաշրջանային և միջազգային հարցերի լայն շրջանակ:
Էդվարդ Նալբանդյանն ու Սերգեյ Մարտինովը անդրադարձել են երկկողմ առևտրատնտեսական փոխգործակցությանը, դրա դիվերսիֆիկացման հնարավորություններին, տնտեսական համագործակցության միջկառավարական հանձնաժողովի աշխատանքներին:
Հայաստանի և Բելառուսի արտգործնախարարները քննարկվել են նաև մշակութային փոխանակումների առավել ակտիվացման նպատակով ձեռնարկվելիք քայլերը:
Սերգեյ Մարտինովի խնդրանքով Էդվարդ Նալբանդյանը ներկայացրել է արցախյան հիմնախնդրի կարգավորմանն ուղղված բանակցությունների վերջին զարգացումները:
Հանդիպումից հետո Հայաստանի և Բելառուսի արտաքին գործերի նախարարները հանդես են եկել համատեղ մամուլի ասուլիսով:
