Ապրիլի 19-ից 21-ը Երևանի Հովհ. Թումանյանի անվան տիկնիկային թատրոնում տեղի կունենա Նարեկ Դուրյանի բեմադրած «Օպերացիա Նեմեսիս» ողբերգության պրեմիերան: Այսօր լրագրողների հետ հանդիպմանը նա նշեց, որ այս հերոսական էջի մասին շատ քիչ է խոսվում, այդ պատճառով ինքը որոշեց այն բեմադրել:
«Գործը բարդ է, բեմի վրա 11 հոգի են խաղում, դեկորներ, երգչախումբ, յուրաքանչյուր դերասան մի քանի դեր է խաղում. այդպես ավելի լավ է, որովհետև դերասանը կարողանում է բեմի վրա կերպարանափոխվել: Նշեմ նաև, որ VivaCell MTS-ն է մեր հովանավորը: Այսքան տարիների ընթացքում առաջին անգամ իմ ներկայացման համար հովանավոր ունեմ»:
Ողբերգությունը հիմնված է Պերճ Զեյթունցյանի «Ոտքի, դատարանն է գալիս» և ֆրանսիացի երկու պատմաբանների ստեղծագործությունների վրա: Թատերագետ Արա Խզմալյանն ասաց, որ հայ թատրոնի ամենամեծ խնդիրը ռիթմի, ժամանակի զգացողությունն է:
« Ինձ համար այս ներկայացման գլխավոր արժեքը ռիթմը և մեղեդայնությունն են: Մենք խոսում ենք թեմայի մասին՝ սպանելով արվեստը: Ասում ենք՝ Սողոմոն Թեհլերյան, և այս թեմայի մեջ փորձում ենք ընդգրկել ամբողջ հայոց հարցը, սպանում ենք արվեստի խնդիրը: Այստեղ պրն Դուրյանի՝ որպես կատակերգակի, տաղանդն է օգնության հասել, որի միջոցով կերպարը դարձել է ավելի մարդկային»,- ասաց նա:
Նարեկ Դուրյանը, խոսելով «Օպերացիա Նեմեսիս»-ի առաջին՝ Սողոմոն Թեհլերյանի դատավարության մասին, ասաց, որ Սողոմոնին հատուկ հրաման էր տրված, որ Թալեաթին սպանելուց հետո չփախչի, թույլ տա, որ իրեն ձերբակալեն, որպեսզի սովորական քրեական դատավարությունը կազմակերպված ձևով փոխակերպեն քաղաքական դատավարության:
«Մի հայ սպանել է մի թուրքի, և հանկարծ դատի ընթացքում պարզվում է, որ զոհը մարդասպանն է, իսկ մարդասպանը՝ զոհ: Մեղադրողը սկսում է պաշտպանվել, որովհետև պաշտպանվողը սկսում է մեղադրել: Չնայած որ դատում էին Սողոմոն Թեհլերյանին, գերմանացի լրագրողները լուսաբանում էին որպես Թալեաթ փաշայի դատավարություն»,- ասաց նա:
Արա Խզմալյանը բեմադրությունը որակեց դիրիժորական ներկայացում:
Նշենք նաև, որ ներկայացումը նվիրված է Մեծ եղեռնի զոհերի հիշատակին և այն մարդկանց, ովքեր իրականացրին «Օպերացիա Նեմեսիս»-ը. այն կտևի 1,5 ժամ:
