Եգիպտոսի զինված ուժերի գերագույն խորհրդի ղեկավար մարշալ Հուսեյն Տանտավին հայտարարել է, որ զինվորական իշխանությունները մինչև նախագահական ընտրությունները երկրի նոր սահմանադրության մշակման կողմ են հանդես գալիս։ Այս մասին կիրակի օրը հաղորդել է եգիպտական հեռուստատեսությունը:
«Զինված ուժերի գերագույն խորհուրդը մինչև նախագահական ընտրությունները նոր սահմանադրություն ստեղծելու կողմնակիցն է»,-ասել է նա եգիպտական առաջատար քաղաքական ուժերի հետ հանդիպման ժամանակ, որն ավարտվել է կիրակի երեկոյան:
Ընդ որում, ինչպես հստակեցրել է Տանտավին իշխանությունը զինվորականներից նոր նախագահին փոխանցելը «պետք է տեղի ունենա նախօրոք սահմանված ժամանակահատվածում` մինչև 2012 թվականի հունիսի 30-ը»:
Եգիպտոսի նախագահի ընտրությունների առաջին փուլը պետք է տեղի ունենա այս տարվա մայիսի 23-24-ը:
Զինված ուժերի գերագույն խորհրդի ղեկավարը եգիպտական խորհրդարանի երկու` վերին և ստորին պալատներին առաջարկել է միացյալ նիստ անել, որպեսզի Սահմանադրական հանձնաժողովի նոր կառուցվածքն ընդունվի, որում առանց բացառության պետք է ներկայացվեն հասարակության բոլոր շերտերը, խմբերը և դավանանքները:
Մի քանի օր առաջ Սահմանադրական հանձնաժողովի աշխատանքը, որը մոտ ժամանակում պետք է մշակեր երկրի նոր հիմնական օրենքը, դադարեցվել էր: Նման որոշման պատճառը նրա ձևավորման սկզբունքներն էին, որոնց հիման վրա հանձնաժողովի ճնշող մեծամասնությունը կազմել են իսլամիստական շարժումների և կուսակցությունների կողմնակիցները, որոնք ներկայացված էին երկրի բարձրագույն օրենսդիր մարմնում: Այդ հանգամանքը դժգոհություն էր առաջացրել լիբերալ-ժողովրդավարական շրջանակներում, որոնք դուրս են եկել հանձնաժողովից և պահանջել են լուծարել այն:
Ինչպես լրագրողներին հաղորդել է իսլամիստական սալաֆիտյան «Ան-Նուռ» կուսակցության ներկայացուցիչ Իմադ Աբդելգաֆուրը, ենթադրվում է, որ Սահմանադրական հանձնաժողովը, ինչպես նախկինում, կազմված կլինի 100 անդամից, սակայն բոլոր նոր անդամները չպետք է խորհրդարանի անդամ լինեն:
