Reuters գործակալության փոխանցմամբ` Քաբուլում գնդակոծվել է ռուսական դեսպանատան շենքը:
Աֆղանական մայրաքաղաքի կենտրոնում, որտեղ տեղակայված են դիվանագիտական ներկայացուցչություններ, լսվել են կրակոցներ և պայթյուններ: Մասնավորապես, թիրախներ եղել են Ռուսաստանի դեսպանատունը և Աֆղանստանի խորհրդարանը: Հաղորդվել է նաև, որ կրակոցներ են հնչել Մեծ Բրիտանիայի դեսպանատան ուղղությամբ:
Մի շարք պայթյուններ իրականացրել են ահաբեկիչ մահապարտները: Բացի այդ, Քաբուլի կենտրոնում նկատվել են զինված անձինք: Agence France Presse-ի փախանցմամբ` նրանցից մեկը մտել է խորհրդարանի շենք, իսկ մեկ այլ զինված անձ կրակոցներ է արձակել կենտրոնական հյուրանոցներից մեկում:
Զանբակ շրջանի հրապարակում, որտեղ գտնվում են մի քանի օտարերկրյա դեսպանատներ, Աֆղանստանի ԱԳՆ շենքը, առնվազն յոթ ուժեղ պայթյուն է տեղի ունեցել:
Դիվանագիտական ներկայացուցչությունների պայթյունների պատասխանատվությունն իր վրա է վերցրել «Թալիբան» շարժումը: Ծայրահեղականների փոխանցմամբ` նրանց գլխավոր թիրախը եղել են Մեծ Բրիտանիայի և Գերմանիայի դեսպանատները, որոնք ահաբեկչության դեմ պայքարում ԱՄՆ-ի դաշնակիցներն են, և ՆԱՏՕ-ի շտաբը:
