Ամերիկյան Ուիչիտա քաղաքում շանը գետից հանելու աշխատանքներին մասնակցել են 20 փրկարարներ և 8 հրշեջ մեքենաներ: Այս մասին հաղորդել է Kansas City Star-ը:
Դեպքը տեղի է ունեցել այն ժամանակ, երբ 79–ամյա Ջոն Յուին՝ Թազ անունը կրող իր շան հետ զբոսնելիս է եղել գետի մոտ: Տղամարդը շան հետ միասին որոշել է հանկարծ սկսված անձրևից պաշտպանվել կամրջի տակ: Շունը անհաջող թռիչք կատարելով` ընկել է ջուրը: Տղամարդը փորձել է նրան հանել ջրից, բայց չի կարողացել: Անցորդներից մեկը կանչել է փրկարարների: 20 փրկարարներ՝ 8 հրշեջ մեքենաներով, ժամանել են դեպքի վայր և սկսել որոնողական աշխատանքները: Երկար ժամանակ փնտրելուց հետո նրանք, վերջիվերջո, գտել են շանը: Լրագրողների հետ հարցազրույցի ժամանակ փրկարարական աշխատանքների ղեկավար Մայքլ Ուելսն ասել է, որ շան փրկարարական աշխատանքները մեծ ջանքեր են պահանջել, ինչպես նաև` շատ մարդիկ և տեխնիկա:
«Բայց մենք հասկանում ենք, թե ինչքան կարևոր են մարդկանց համար իրենց սիրելի կենդանիները: Մենք ուրախ ենք այստեղ գտնվելու համար: Այսօր լավ օր էր»,- ասել է նա:
