ՄԱԿ-ի գլխավոր քարտուղար Պան Գի Մունը հայտարարել է, որ Սիրիայում կատարվող իրադարձությունների պատճառով երկում ստիպված գաղթական է դարձել մոտ մեկ միլիոն մարդ:
«Մենք շատ ենք անհանգստացած այն հանգամանքով, որ առնվազն մեկ միլիոն մարդ Սիրիայի ներսում ճարահատյալ գաղթական է դարձել, նաև նրանց մեծ մասը փախել է հարևան երկրներ»,- հայտարարել է Պան Գի Մունը՝ Ժնևում Քոֆի Անանի հետ ունեցած հանդիպումից հետո:
Նշենք, որ Սիրիայի իշխանությունները հինգշաբթի օրն այն բանից հետո, երբ ուժի մեջ է մտել կառավարական զորքերի և ընդդմադիր ուժերի միջև ռազմական գործողությունները դադարեցնելու մասին համաձայնագիրը, փախստականներին կոչ են արել վերադառնալ Սիրիա: Ոչ պաշտոնական տեղկատվության համաձայն՝ փախստականների թիվը կարող է կազմել հարյուր հազար մարդ:
Հիշեցնենք, որ շաբաթ օրը ՄԱԿ ԱԽ-ն հաստատել է Սիրիա դիտորդական խումբ ուղարկելու բանաձևը: ՄԱԿ-ի գլխավոր քարտուղար Պան Գի Մունը հայտարարել է, որ երկրի իշխանությունները պետք է ապահովեն դիտորդների անարգելք տեղաշարժը երկրով մեկ: Նա նաև նշել է, որ դիտորդները Դամասկոս կժամանեն ամենամոտ ժամանակներս: Պան Գի Մունի խոսքերով՝ մինչև չորեքշաբթի օրը ինքը կկազմի Սիրիա 250 դիտորդներ ուղարկելու առաջարկություն:
