Լատինական Ամերիկայի երկրներում թմրանյութերի դեմ պայքարի այլընտրանքային ուղիների հարցը կարող է օրակարգում դրվել,-հայտարարել է ԱՄՆ նախագահ Բարաք Օբաման:
-Անձամբ ես և իմ վարչակազմը կարծում ենք, որ թմրանյութերի օրինականացումը ելք չէ, սակայն պետք է գնահատել իրավիճակը և այդ հարցի շուրջ քննարկումներ սկսել,- ասել է Օբաման Կոլումբիայում անցկացվող Ամերիկաների 6-րդ գագաթաժողովի ժամանակ:
Թմրանյութերի հնարավոր օրինականացման հարցը վերջին ամիսներին ակտիվորեն քննարկվում է Գվատեմելայի նախագահ Օտտո Պերեսա Մոլինայի նախաձեռնությամբ: 2011 թվականին նախագահի պաշտոնում ընտրվելով` նախկին զինվորական Պերես Մոլինան սկսեց կողմ արտահայտվել թմրանյութերի հնարավոր օրինականացման հարցի վերաբերյալ: Փետրվարի կեսին, նա հայտարարեց, որ առանց ԱՄՆ խորհուրդների` Գվատեմալան դիտարկում է նման որոշում ընդունելու հնարավորությունը: Ավելի ուշ նա ԱՄՆ-ին մեղադրեց Կենտրոնական Ամերիկայի իր գործընկեր երկրներից մի քանիսի նկատմամբ ճնշում գործադրելու համար, որպեսզի վերջիններս չմասնակցեին թմրանյութերի դեմ պայքարի հարցերի տարածաշրջանային գագաթաժողովին: Մոլինայի կարծիքով` այն երկրները, որոնք թմրանյութեր չեն արտադրում, սակայն թմրանյութերի խոշոր սպառողներ են, պետք է միավորեն ջանքերը թմրաթրաֆիքի դեմ պայքարում:
Նրա կարծիքով` պետք է պետության կողմից ստեղծվի թմրանյութերի շուկան վերահսկող մարմին: Նման կերպ են վերահսկվում նաև ծխախոտի և ալկոհոլի շուկաները:
Օբամայի հայտարարությունից առաջ ԱՄՆ-ը այս հարցում անդրդվելի էր: Համակարծիք էին Սալվադորն ու Նիկարագուան: Կոլումբիայի նախագահ Խուան Մանուել Սանտոսը անցած տարեվերջին հայտարարել էր, որ իր երկիրը պատրաստ է միջազգային մակարդակով թմրանյութերի օրինականացման հնարավոր քննարկմանը:
Տարածաշրջանային հանդիպմանը, առանց պատճառաբանության, չի ներկայացել Նիկարագուայի նախագահ Դանիել Օրտեգան: Բացակայել է նաև Վենեսուելայի նախագահ Ուգո Չավեսը: Նրա բացակայությունը պայմանավորված է հիվանդությամբ: Գագաթաժողովին ներկա չի եղել նաև Էկվադորի նախագահ Ռաֆայել Կորեան: Նա հրաժարվել է մասնակցությունից, քանի որ Կուբան հրավիրված չի եղել տարածաշրջանային հանդիպմանը: