Օրերս լրագրողների հետ հանդիպմանը ԱԺ պատգամավոր, թիվ 1 ընտրատարածքում լրագրող Գայանե Առուստամյանի դեմ առաջադրված Ռուբեն Հայրապետյանը, անդրադառնալով մրցակցի` իր հետ բանավիճելու առաջարկին, հայտարարել էր, որ ինքը կնոջ հետ չի ցանկանում բանավիճել: Փոխարենը հանրապետական Ռուբեն Հայրապետյանը կոչ էր արել ՀԱԿ-ի առաջին տասնյակում ընդգրկված տղամարդկանց, բացի երրորդ համարից` «Հանրապետություն» կուսակցության առաջնորդ Արամ Սարգսյանից, գալ և բանավիճել իր հետ: Նախօրեին Հայ ազգային կոնգրես ընդդիմադիր դաշինքի կողմից թիվ 7 ընտրատարածքում առաջադրված Նիկոլ Փաշինյանն իր պաշտոնական կայքէջում անդրադարձել էր թիվ 1 ընտրատարածքում առաջադրված Հայաստանի ֆուտբոլի ֆեդերացիայի նախագահ Ռուբեն Հայրապետյանի այդ հայտարարությանը և նրան հրավիրել էր բանավեճի:
Հիշեցնենք, որ «Արմնյուզ» հեռուստաընկերության ղեկավար Արտակ Ալեքսանյանը կողմերի համաձայնության պարագայում պատրաստակամություն էր հայտնել կազմակերպել նման բանավեճ և կոչ արել դա անել ս/թ ապրիլի 16-ին, երկուշաբթի օրը, ժամը 22.00-ին: Փաշինյանը հայտարարել էր, որ նշված օրը և ժամին կլինի «Արմնյուզում»:
«Առաջին լրատվական»-ը կապվեց Ռուբեն Հայրապետյանի հետ:
Հետաքրքրվեցինք, թե ինքն ընդունու՞մ է Նիկոլ Փաշինյանի բանավեճի հրավերը և կլինի՞ նախատեսված ժամին բանավեճի սրահում:
«Եթե Նիկոլն ինքը գար ասուլիսս լուսաբանելու, կհասկանար, որ ես ասել եմ` պատրաստ եմ բանավիճել ՀԱԿ-ի առաջինից 10 համարի հետ, հանած 3-րդ համարին, քանի որ Արամ Սարգսյանը իմ ընկերն է և ես նրա հետ բանավիճելու բան չունեմ: Եթե Նիկոլն ապրիլի 16-ին, ժամը 22:00-ին իր առաջնորդ Լևոն Տեր-Պետրոսյանի ու իր մյուս 8 տեղերի հետ լինի Արմնյուզում, ես ուղիղ ժամը 22:00-ին կլինեմ: Ասեմ, որ ես որպես ճշտապահ մարդ` ոչ մի տեղից չեմ ուշանում: Ես ինչպե՞ս կարող էի Նիկոլին առաջարկել ինձ հետ բանավիճել, եթե հայտարարել եմ, որ չեմ հարգի իմ ընկերոջը, Սամվել Ալեքսանյանին, եթե ընդունի Նիկոլի առաջարկը: Տրամաչափի խնդիր կա: Այնպես որ սպասում եմ Նիկոլի 9 հոգանոց թիմին` իր առաջնորդի գլխավորությամբ»,- պատասխանեց Ռուբեն Հայրապետյանը: