Վրաստանի նախագահը շաբաթ օրն այցելել է Ռուսաստանի հետ սահմանի մոտ կառուցվող երկու հիդրոէլեկտրակայան, հաղորդում է Trend.az-ը:
Միխայիլ Սաակաշվիլին Վրաստանի Էներգետիկայի և բնական պճաշարների նախարար Ալեքսանդր Խեթագուրի ուղեկցությամբ հանդիպել է ԼարսՀԷԿ-ի և ԴարիալՀԷԿ-ի շինարարների հետ:
ԼարսՀԷԿ-ի հզորությունը 20 մեգավատտ է, իսկ ԴարիալՀԷԿ-ինը` 110 մեգավատտ: Ինչպես հաղորդել է Վրաստանի նախագահը, երկիրը նոր հզոր էլեկտրաէներգիայի կարիք ունի, քանի որ տնտեսությունը ծաղկում է:
«Մենք այդ հզորության կարիքն ունենք, և ես չեմ հասկանում այն մարդկանց, ովքեր ասում են, որ մեզ ՀԷԿ անհրաժեշտ չէ: Եթե մենք 80-ական թվականների վերջում կառուցած լինեինք ԽուդոնՀԷԿ-ը, ապա հետո կախված չէինք լինի Ռուսատանից, իսկ թե այդ կախվածությունը մեզ համար ինչ արժեցավ` բոլորդ լավ գիտեք»,- նշել է նա:
Սաակաշվիլին ընդգծել է, որ մինչ 2015 թվականը Վրաստանում կառուցված կլինի 15 նոր ՀԷԿ, որոնք հնարավորություն կտան ոչ միայն զարգացնել տնտեսությունը, այլև ստեղծել նոր աշխատատեղեր: «Ընդ որում` դրանք ոչ միայն պարզապես աշխատողներ, այլ նաև մասնագիտացած կադրեր կլինեն, որոնց հիմա պատրաստում են երկրի բուհերում, և այդ մարդիկ կշահագործեն մեր ՀԷԿ-երը»,- ասել է նա:
Վրաստանի նախագահն ընդգծել է նաև, որ նոր ՀԷԿ-երը հնարավորություն կտան կազմակերպել Էլեկտրաէներգիայի լուրջ արտահանումներ դեպի Եվրոպա: «Դա շատ կարևոր է, քանի որ Եվրոպան էներգիակիրների կարիք ունի, իսկ մենք կմատակարարենք էկոլոգիապես մաքուր էներգիա և դրանից շահույթ կստանանք»,- նշել է նա:
Վրացական կառավարության ռազմավարության շրջանակներում մասնավոր ներդրողներն ամբողջ երկրում արդեն սկսել են 15 ՀԷԿ-ի կառուցումը: Էլեկտրաէներգիան պետք է բավարարի Վրաստանի աճող պահանջարկը և ուղղված լինի Թուրքիա և Արևելյան Եվրոպայի երկրներ մատակարարելուն:
