Հարավային Սուդանի Հանրապետության բանակին հաջողվել է ետ մղել սուդանական բանակի հարձակումը վիճելի, նավթով հարուստ Հեգլիգ շրջանում:
«Անցած շաբաթ նրանք փորձել են հարձակվել մեր դիրքերի վրա՝ Հեգլիգից 40 մղոն հեռավորության վրա, բայց հարձակումը հաջողվել է ետ մղել»,- հայտնել է Հարավային Սուդանի տեղեկատվության նախարար Բարնաբա Մարիալ Բենջամինը: Նրա խոսքերով` Հեգլիգը դեռևս գտնվում է Հարավային Սուդանի Հանրապետության հսկողության ներքո:
Սուդանի բանակը հարձակումը սկսել է ուրբաթ՝ հույս ունենալով հարցը լուծել մի քանի ժամվա ընթացքում:
Հիշեցնենք, որ Հարավային Սուդանը անկախ է հռչակվել 2011թ. հուլիսի 9-ին: Անկախության ձեռքբերումից հետո նրան են անցել նավթային հանքերի կեսը, որոնք նախկինում պատկանում էին միասնական Սուդանին: Սակայն երկու երկրների միջև սահմանային հարցերը դեռ լուծված չեն, ինչը զինված բախումների պատճառ է դառնում:
