Երեկ ՄԱԿ-ի Անվտանգության խորհուրդը խստորեն դատապարտել է Գվինեա-Բիսաու աֆրիկյան երկրում տեղի ունեցած ռազմական հեղաշրջումը և պահանջել է ապահովել երկրի նախագահի պաշտոնակատարի և վարչապետի անվտանգությունը: Ռազմական հեղաշրջումը դատապարտող հայտարարությամբ հանդես է եկել նաև Միացյալ Նահանգների պետքարտուղարությունը: Այս մասին հաղորդում է «Ազատություն» ռադիոկայանը:
Միաժամանակ հակասական տեղեկություններ են ստացվում աֆրիկյան այդ երկրից: Ռազմական հեղաշրջումը կատարած զինվորականները հաղորդում են գործող վարչապետի ձերբակալության մասին, սակայն օտարերկրյա դիվանագիտական աղբյուրները նշում են, որ հնարավոր է` Կարլուշ Գոմիշը գտնվում է դեսպանատներից մեկի տարածքում:
Գվինեա-Բիսաուի զինվորականությունը երեկ դիմել է երկրի առաջատար քաղաքական ուժերին` «ազգային համաձայնության կառավարություն» ձևավորելու համար: Միաժամանակ նրանք նշել են, որ ռազմական հեղաշրջում իրականացրած խումբն իր ձեռքում կպահի կառավարության մի շարք առանցքային պաշտոններ: Զինվորականները հաղորդում են, որ հեղաշրջումը պայմանավորված է հարևան Անգոլայի ներխուժումը կանխելու անհրաժեշտությամբ:
