Եվրամիությունը, որը հավելյալ քաղաքական պայմաններ է դնում Հունգարիային վարկերի տրամադրման համար, զբաղվում է շանտաժով: Այս մասին ինչպես գրում է portfolio.hu պորտալը, հայտարարել է Հունգարիայի վարչապետ Վիկտոր Օրբանը: Bloomberg-ի տվյալով` նա նաև հավելել է, որ Հունգարիան կարող է ԵՄ-ի դեմ հայց ներկայացնել Եվրոպական դատարան:
Հունգարիան դեռ 2011թ. նոյեմբերին խնդրել էր Արժույթի միջազգային հիմնադրամին (ԱՄՀ) ու ԵՄ-ին` տրամադրել 15-20 մլրդ եվրո վարկ:
Դա պատահել էր այն բանից հետո, երբ տեղի արժույթը ընկել էր` հասնելով եվրոյի նկատմամբ պատմական նվազագույնին (մինիմումին), իսկ Հունգարիայի համար պարտքի արժեքը հակառակը, կտրուկ աճել է: Մինչ օրս գումարի տրամադրման հարցը դեռ չի լուծվել:
Ավելի վաղ ԵՄ-ն ու ԱՄՀ-ն հայտարարել էին, որ դեմ չեն վարկ տրամադրելուն: Օրբանը ընդգծել է, որ ԱՄՀ-ում որոշել են Հունգարիային գումար տրամադրել առանց հավելյալ տնտեսական պայմանների, իսկ ահա ԵՄ-ն մտածում է այն բանի շուրջ, որ Հունգարիային ստիպի անցկացնել մի քանի բարեփոխում, օրինակ` դատական ոլորտում: Այս մասին հայտնում է Agence France-Presse-ը: