Ռուսաստանի արտգործնախարար Սերգեյ Լավրովը Չիկագոյում մասնակցել է «Մեծ ությակի» արտգործնախարարների հանդիպմանը, որի ժամանակ նրանց այդպես էլ չի հաջողվել համաձայնության գալ մի շարք կարևոր հարցերում:
«Մեծ ությակի» երկրները իրենց հայտարարության մեջ ընդգծել են. մենք ողջունում ենք Սիրիայում կրակի դադարեցնման համաձայնությունը, ողջունում ենք, որ կրակի դադարեցում հաստատվել է, թեկուզև փխրուն՝ որոշակի մանր միջադեպերով: Սակայն ինչպես ասել է Քոֆի Անանը՝ զեկուցելով Անվտանգության խորհրդում, սա ինչ-որ անսովոր բան չէ նման իրավիճակի համար: Մենք պայմանավորվել ենք կոնսոլիդացնել այս նոր իրավիճակը»,- ասել է Լավրովը՝ խոսելով գագաթնաժողովին Սիրիայի վերաբերյալ քննարկումների մասին:
Նա ավելացրել է, որ ԱՄՆ պետքարտուղար Հիլարի Քլինթոնը համաձայնել է, որ անհրաժեշտ է խաղաղության կոչեր անել ոչ միայն Ասադին, այլև նրա հակառակորդներին: «Հիլարի Քլինթոնը համաձայնել է, որ կառավարության հետ աշխատանքին զուգահեռ,- իսկ նման աշխատանք մենք գրեթե ամեն օր տանում ենք,- անհրաժեշտ է նման ազդանշաններ ուղարկել նաև ընդդիմությանը»:
Գագաթնաժողովի ընթացքում սակայն նման համաձայնություն Լավրովի և Քլինթոնի փոխհարաբերություններում չի նկատվել: Բանակցությունների նախօրին Քլինթոնը Մոսկվային մեղադրել էր, որ նրա համառության ապտճառով Սիրիայի նախագահ Բաշար Ալ-Ասադը մինչև հիմա ձեռքում է պահում իշխանությունը, և արյունահեղությունը շարունակվում է: Ուստի գագաթնաժողովին ներկա բոլոր քաղաքական գործիչները և լրագրողները սպասում էին Լավրովի պատասխանին:
Լավրովը, սակայն, ԱՄՆ իր գործընկերոջ հետ վեճի մեջ չի մտել: «Կոմերսանտ» թերթը գրում է, որ Քլինթոնի ելույթի ժամանակ նա զբաղված է եղել հնարավոր ամեն բանով, բացի նրան լսելուց: Սկզբում նա լայն ժպիտով ինչ-որ բան է քննարկել իր տեղակալ Սերգեյ Ռյաբկովի հետ (կողքից այնպիսի տպավորություն էր, կարծես թե նրանք միմյանց անեկդոտ են պատմում), իսկ հետո երկար ինչ-որ թղթեր է թերթել, իսկ ելույթի վերջում ձանձրույթի արտահայտությունը դեմքին, սկսել է ուսումնասիրել հավաքվածներին:
Բանակցություններից հետո լրագրողներն այնուամենայնիվ խնդրել են մեկնաբանել իր ամերիկյան գործընկերոջ արտահայտությունները: «Մենք հանգիստ ենք վերաբերվում այդ բոլոր զգացմունքային արտահայտություններին,- ասել է Լավրովը։- Չի՞ պատահում, որ մեկը մյուսին օգնում է մնալ իշանության գլուխ: Եթե մենք սկսենք հաշվել, թե որ վարչակարգերն են վայելում ԱՄՆ-ի հովանավորությունը, հազիվ թե ավարտենք: Մեղավորներ փնտրելը՝ «այստեղ քո մեղքն է, այնտեղ՝ նրա», մեր մոտեցումը չէ»:
Լավրովն ավելացրել է, որ Ասադը շարունակում է մնալ իշխանության գլուխ ոչ թե որովհետև այդպես ուզում են Ռուսաստանը կամ Չինաստանը, այլ որովհետև նա ներկայացնում է սիրիացի ժողովրդի զգալի հատվածին: «Որոշ գնահատականներով՝ այն կազմում է Սիրիայի բնակչության կեսից ավելին: Եվ երբ ասում են, որ ինչ-որ ընդդիմադիր բլոկ սիրիացի ժողովրդի օրինական ներկայացուցիչն է, դա չափազանցություն է,- վրդովված ասել է նախարարը:- Խնդիրը ոչ թե պիտակներ կպցնելն է, այլ սիրիացիներին բանակցությունների սեղանի շուրջ նստեցնելը»:
