Նախկին հյուսիսիկորեական բժիշկը, որն աշխատել է տեղի առաջնորդների կյանքի երկարացման ծրագրի վրա, բայց 2011 թ. փախել է արտասահման, հայտարարել է, որ Կիմ Չեն Իրի կտակն իր մոտ է: Այս մասին հաղորդում է Agence France-Presse գործակալությունը:
Լի Են Կոլը պատմել է, որ դեկտեմբերին մահացած հյուսիսկորեական առաջնորդը կոչ է արել իր կողմնակիցներին չդադարեցնել զանգվածային ոչնչացման զենքի ստեղծման աշխատանքները:
«Հիշեք` միայն միջուկային, քիմիական և կենսաբանական, ինչպես նաև հեռահար հրթիռների հնարավորությունների զարգացումը ի վիճակի են խաղաղություն պահպանել Կորեական թերակղզում: Մի մոռացեք այդ մասին ոչ մի վայրկյան»,- նշվում է տրամադրված տեքստում:
Բացի դրանից, Կիմ Չեն Իրն իշխանությունների ուշադրությունը հրավիրել է Միացյալ Նահանգների դեմ հոգեբանական պատերազմում հաղթանակ տանելու անհրաժեշտության վրա:
«Մենք կարող ենք հաղթել, եթե համառորեն պնդենք միջուկային ծրագրի օրինականության մասին»,- ասել է առաջնորդը:
Համաձայն հրապարակված տեքստի` մահվանից առաջ
ԿԺԴՀ-ի նախկին առաջնորդը իր կողմնակիցներին զգուշացրել է շատ զգուշ լինել Չինաստանի հետ, որը շատ մոտ ապագայում դաշնակից երկրից կարող է վերածվել մի երկրի, որին ամենից ուշադիր պետք է հետևել:
«Պատմականորեն Չինաստանը խնդիրների աղբյուր է Կորեայի համար: Հիշեք այդ մասին և զգուշ եղեք»,- գրված է կտակում:
Բժշկի խոսքերով՝ նա այս փաստաթուղթը ստացել է մի մարդուց, որն անմիջականորեն կապ ունի ԿԺԴՀ-ի ղեկավարության հետ:
Կտակի մասին այս աղմուկը բարձրացավ տարածաշրջանում ծագած հերթական ճգնաժամի ընթացքում: Հյուսիսային Կորեան հայտարարել էր արբանյակի արձակման մասին, ինչին դեմ են դուրս եկել ԱՄՆ-ն և հարակից երկրները, որոնք կարծում են, որ խոսքը հեռահար հրթիռների փորձարկման մասին է:
Բացի այդ, հարավկորեական հետախուզությունը կարծում է, որ Փհենյանը մտադիր է մոտ ապագայում վերսկսել միջուկային զենքի փորձարկումները:
