Հովհ. Թումանյանի անվան տիկնիկային թատրոնի տնօրենը շատ լավատեսորեն է տրամադրված և չի գանգատվում թատրոնի խնդիրներից. «Ես ընդհանրապես չեմ սիրում լաց լինել և գանգատվել: Եթե խոսենք ֆինանսական վիճակից, ապա ասեմ, որ տիկնիկային թատրոնի գեղղեկավարի ու տնօրենի աշխատավարձը հավասար է որևէ նախարարության ցածր մակարդակի չինովնիկի աշխատավարձին: Իսկ շենքային խնդիրների մասին կարող եմ ասել՝ ինչքանո՞վ է նպատակահարմար, որ թատրոնը գտնվի 13 հարկանի շենքի 1-2-րդ հարկերում։ Ուրեմն, դա ուրիշ պրոբլեմ է, ինչ որ կա՝ կա: Կարծում եմ, պայմանները վատը չեն, որովհետև ամեն դեպքում այս պայմաններում փորձում ենք այնպես անել, որպեսզի բոլոր ծառայություններն էլ իրենց տեղը ունենան, չնայած այսօրվա այն աշխատանքային ծավալը, որ թատրոնը տանում է, իհարկե, չի բավարարում. մոտավորապես 32 ներկայացում խաղացանկում, տիկնիկներ, դեկորներ և այլն, և այլն, արդեն տեղ չկա: Տիկնիկները ժամանակ առ ժամանակ կարիք ունեն վերանորոգվելու, և մշտապես այդ աշխատանքները տարվում են»:
Թատրոնի տնօրենը անդրադարձավ նաև պրոֆեսիոնալ խնդիրներին՝ ասելով, որ թատրոնը մի մեծ մեխանիզմ է, որտեղ պետք է աշխատեն կոնկրետ թատերական մասնագետներ. «ժամանակակից աշխարհում շատ արագ է զարգանում թատերական մասնագետների մեխանիզմը, իսկ մենք դեռ գտնվում ենք քարե դարում, ընդ որում՝ ոչ այնքան տեխնիկայի, որքան մասնագետների պատրաստվածության տեսակետից, որովհետև որևէ տեղ նրանք չեն պատրաստվում, պրակտիկա չեն անցնում»:
Տիկնիկային թատրոնը անցյալ տարի հանդիպեց դպրոցում տոմսեր և աբոնեմենտներ տարածելու արգելքի հետ. «Մենք արդեն հոգնել ենք այդ փաստից, որովհետև քաղաքապետարանի յուրաքանչյուր նոր կրթության վարչություն իր գործունեությունը սկսում է դրանից: Անցյալ տարի այդ արգելքը շատ խիստ գործեց, որի արդյունքում, ճիշտ է, թատրոնը ֆինանսապես չտուժեց, սակայն հանդիսատեսի պակաս ունեցավ: Դպրոցներին տոմսեր բաժանելով՝ երեխաները չէին զրկվում թատրոն գալուց. այստեղ կա նաև հասարակական մեծ պրոբլեմ, որովհետև եթե մենք փորձում ենք ունենալ քաղաքակիրթ հասարակություն, ապա մշակույթը պետք է սերմանել վաղ տարիքից: Հասարակությունը ատամներն է, իսկ մշակույթը` ատամի մածուկը, և եթե մենք այդ մշակույթը չենք օգտագործում, ուրեմն հետո չենք կարող բողոքել, որ կարիես ենք ձեռք բերում»:
Հովհ. Թումանյանի անվան տիկնիկային թատրոնում բեմադրվում են տարբեր տարիքի համար նախատեսված ներկայացումներ. «Մեր թատրոնում շատ ներկայացումներ կան ընտանիքի համար: «Թռիչք քաղաքի վրայով» ներկայացումը նույնպես մեծահասակների ներկայացում է: Տիկնիկային թատրոնը թատերարվեստի մի ձև է, որը նախատեսված է երեխաների, մեծահասակների, դեռահասների համար: Մենք փորձում ենք այս ամբողջ դիապազոնով գործել` կիրառելով տիկնիկային բոլոր ձևերը»,- նշեց Բաբայանը:
