ԱՄՆ–ը Աֆղանստանում թալիբների հետ բանակցություններ չի վարում, սակայն աջակցում է ազգային հաշտությանն ուղղված ներաֆղանական երկխոսությանը։ РИА Новости-ն գրում է, որ չորեքշաբթի օրը Քաբուլում ԱՄՆ դեսպանատանն այս մասին հայտնել է դեսպանորդ-խորհրդական Ջեյմս Կաննինգհեմը:
Դիվանագետի խոսքերով՝ կիրակի օրը գիշերային ռեյդերը դադարեցնելու մասին ստորագրված հուշագիրը և ամերիկյան բանտերում գտնվող աֆղան ձերբակալվածներին Աֆղանստանին հանձնելու արձանագրությունը կարևոր քայլեր են՝ ԱՄՆ-ի հետ երկարաժամկետ ռազմավարական համագործակցության մեջ հաջողության հասնելու ճանապարհին:
Հույս հայտնելով, որ համաձայնագիրը կկնքվի մինչև ՆԱՏՕ-ի գագաթնաժողովը, որը տեղի կունենա մայիսին, Կաննինգհեմը նշել է, որ այդ գագաթնաժողովի ժամանակ կքննարկվեն 2014 թվականից հետո աֆղանական անվտանգության ուժերի ֆինանսավորման հարցերը։
Նշելով, որ ԱՄՆ–ը չի ձգտում մշտական ռազմաբազաներ ունենալ աֆղանական տարածքում, դիվանագետն, այնուամենայնիվ, ասել է. «Համաձայնագիրը կնքելուց հետո մենք կքննարկենք աֆղանական բազաների և միջոցների օգտագործման հետ կապված տեխնիկական և կազմակերպչական հարցերը»։
