Աֆղանստանի հարավում և արևմուտքում կառավարական հաստատությունների վրա «Թալիբան» շարժման զինյալների հարձակումների հետևանքով զոհվել է առնվազն 19 մարդ, հիմնականում ոստիկաններ: Այս մասին հաղորդում է ITAR-TASS-ը՝ վկայակոչելով աֆղանական կառավարության ներկայացուցչին:
Հաղորդվում է, որ երկու ահաբեկչություն է իրականացվել Հելմանդ մարզում, որտեղ երեք մահապարտ գրոհայիններ հարձակում են իրականացրել ոստիկանության շենքի վրա: Նրանցից մեկը սպանվել է շենքին մոտենալու պահին, բայց մյուս երկուսին հաջողվել է գործի դնել պայթուցիկ սարքերը, որի հետևանքով զոհվել է 4, վիրավորվել 5 ոստիկան: Ավելի ուշ, երբ դեպքի վայր են բերվել լրացուցիչ ոստիկանական ուժեր, իրեն պայթեցրել է ևս մեկ մահապարտ, ինչի հետևանքով զոհվել է 3, վիրավորվել 4 ոստիկան:
Երրորդ ահաբեկչությունն իրականացվել է Աֆղանստանի հարավային՝ Հերաթ մարզում, որի վերահսկողությունը անցյալ տարվա վերջում ամերիկացիները հանձնել էին աֆղանական անվտանգության ուժերին: Այս պայթյունի հետևանքով զոհվել է 12, վիրավորվել 39 մարդ: Զոհերի թվում կան նաև խաղաղ բնակիչներ:
Աֆղանստանի նախագահ Համիդ Քարզայը դատապարտել է ահաբեկչությունները՝ նշելով, որ «կանանց և երեխաների սպանությունը իսլամի սուրբ կրոնով դիտվում է որպես սատանայական գործողություն և վախկոտության դրսևորում»:
