ՄԱԿ-ի և Արաբական պետությունների լիգայի հատուկ բանագնաց Քոֆի Անանն այսօր հայտարարել է, որ Սիրիայի կառավարությունն իրեն խոստացել է հետևել կրակի դադարեցման իր պարտավորություննրին: Այս մասին հաղորդում է BBC-ն՝ վկայակոչելով Թեհրանում արված ԱՆանի հայտարարությունը:
Նրա խոսքերով՝ Սիրիայի իշխանությունները խոստանում են կրակը դադարեցնել ապրիլի 12-ի առավոտյան:
Հիշեցնենք. երեկ Անանը մեկնել էր Իրան՝ Սիրիայի իրավիճակի վերաբերյալ տեղի իշխանությունների հետ բանակցելու համար: Ավելի վաղ Սիրիայի ընդդիմությունը հայտարարել էր, որ Սիրիայի ճգնաժամի կարգավորման վերաբերյալ Անանի ծրագիրը պետք է վերանայվի, եթե ապրիլի 12-ին կառավարական զորքերը չդադարեցնեն կրակը: Սիրիայի ազգային խորհրդի ներկայացուցչի խոսքերով՝ առայժմ ոչ մի նշան չկա, որ Սիրիան պատրաստվում է դադարեցնել կրակը:
Ինքը՝ Անանը, հայտարարել է, որ Սիրիայում արյունահեղությունը պետք է դադարեցվի առանց նախապայմանների:
