Նավթի գները միջազգային շուկաներում երեկ նվազել էին, երբ ԱՄՆ էներգետիկայի նախարարության կողմից հրապարակվեցին վառելիքային հումքի շաբաթական պաշարների աճի վերաբերյալ տվյալները, ինչպես նաև Չինաստանում դրամավարկային քաղաքականության պայմանների խստացման վերաբերյալ տարածվող խոսակցությունների արդյունքում: Այս մասին հաղորդում է «Ռոյթեր» գործակալությունը: Մարտ ամսվա ֆյուչերսների գները հյուսիսային նավթի Brent Crude Oil տեսակի համար լոնդոնյան IСE (InterContinental Exchange Futures) բորսայում իջել է 1.58 դոլարով` կազմելով 96.58 դոլար 1 բարելի դիմաց: Նյու Յորքի բորսայում (New York Merchantile Exchange) ամերիկյան թեթև նավթի (Light Sweet Crude Oil) մարտյան ֆյուչերսների գինը իջել է 2 դոլարով` կազմելով 88.86 դոլար 1 բարելի դիմաց: Նավթի գնահատված շաբաթական պաշարները (մինչև հունվարի 14-ը) ԱՄՆ-ում աճել են 2.6 միլիոն բարելով: Շատ վերլուծաբաններ սպասում էին պաշարների նվազում 2.2 միլիոն բարելով: Բենզինի ընդհանուր պաշարները աճել են 4.4 մլն բարելով կամ 1.9%-ով` կազմելով 227.67 միլիոն բարել: Երեկ` հինգշաբթի, հայտնի դարձավ նաև, որ 2010 թ. չորրորդ եռամսյակում Չինաստանի ՀՆԱ-ը նախորդող տարվա չորրորդ եռամսյակի համեմատ աճել է 9.8%-ով: Սա խոսակցություններ առաջ բերեց, թե Չինաստանի իշխանությունները կարող են խստացնել դրամավարկային քաղաքականության պայմանները: Դեկտեմբերին տասներկուամսյա գնաճը Չինաստանում կազմել է 4.6%` նոյեմբերի 5.1%-ի փոխարեն:
