Ինչպես «Առաջին լրատվական»-ի հետ զրույցում ասաց Տաշիրի քաղաքապետ Նշան Սողոյանը՝ թիվ 32 ընտրատարածքում ԱԺ պատգամավորության թեկնածու առաջադրված Անուշավան Նիկողոսյանը հերյուրանքներ է տարածում՝ ասելով, թե Տաշիրի քաղաքապետ Նշան Սողոյանը վերջինիս քարոզչական պաստառը տեղադրելիս ապօրինի և բռնի գործողությունների է դիմել՝ սպառնալով հաշվեհարդար իրականացնել պաստառը փակցնող անձանց նկատմամբ:
«Նման բան չկա, դա ընդամենը քաղաքական դիվիդենտներ շահելու համար տարածված հերյուրանք է: Ես, ելնելով օրենսդրական պահանջներից, ընդամենը փորձել եմ պարզել՝ այդ մարդիկ ովքե՞ր են, ի՞նչ գործողություն են կատարում: Պաստառը տեղադրող բանվորներին հարցրել եմ՝ դրա համար պայմանագիր կամ համապատասխան փաստաթուղթ ունե՞ն: Ընդամենը խնդրել եմ, որ ամեն ինչ հիմնավոր լինի: Հավատացնում եմ, որ նույն հարցը կտայի նմանօրինակ գործողություն կատարող ցանկացած մեկ այլ անձի, այդ թվում՝ նույն թիվ 32 ընտրատարածքում պատգամավորության թեկնածու առաջադրված Կարեն Կարապետյանի թիմակիցներին»,-ասաց Սողոմոնյանը:
Նա նաև հերքեց, որ պաստառ փակցնողների հետ խոսակցության ժամանակ ասել է, թե «իր քաղաքում» ոչ մեկն իրավունք չունի այլ պաստառ տեղադրել: «Ես Անուշավան Նիկողոսյանին չեմ ճանաչում, նրան տեսած չկամ, որևէ առնչություն չեմ ունեցել»,- ասաց Տաշիրի քաղաքապետը:
Նշենք, որ թիվ 32 ընտրատարածքում ԱԺ պատգամավորության թեկնածու առաջադրված Անուշավան Նիկողոսյանի նախընտրական շտաբը հայտարարություն է տարածել, որում նշում է, որ ապրիլի 8-ին, ժամը 18-ի սահմաններում, Տաշիր քաղաքի Երևանյան խճուղու վրա գտնվող ԷԳԱ ՍՊԸ-ին պատկանող գովազդային վահանակին թիվ 32 ընտրատարածքի ՀՀ ԱԺ պատգամավորության թեկնածու Անուշավան Նիկողոսյանի քարոզչական պաստառը տեղադրելիս Տաշիրի քաղաքապետ Նշան Սողոյանի կողմից կատարվել է ապօրինի և բռնի գործողություն:
Նա մի քանի ուղեկցող ավտոմեքենաների շքախմբով մոտեցել և սպառնացել է հաշվեհարդար տեսնել պաստառը փակցնող անձանց նկատմամբ՝ պահանջելով անհապաղ դադարեցնել թիվ 32 ընտրատարածքի ՀՀ ԱԺ պատգամավորության թեկնածու Անուշավան Նիկողոսյանի քարոզչական պաստառի տեղադրումը:
