ՀՀ վերականգնվող էներգետիկայի բնագավառի զարգացման միտումների վերաբերյալ Հանրային ծառայությունները կարգավորող հանձնաժողովի հրապարակած տեղեկատվության համաձայն՝ 2011 թ., ելնելով գործող կառուցման լիցենզիաների ավարտման ժամկետներից, պետք է գործարկվեին 26 ՓՀԷԿ-եր, որոնցից փաստացի գործարկվել են 7-ը: Հարկ է նշել, որ «ՄԿՇԳ ԷՆԵՐԳԻԱ» ՍՊԸ-ի «Մարտունի», «ԿԱՐԲԻ ՋՐՀՈՍ» ՀԷԿ» ՍՊԸ-ի «ԿԱՐԲԻ ՋՐՀՈՍ», «ՍԻՐԱՐՓԻ ԱՀ» ՍՊԸ-ի «ՍԻՐԱՐՓԻ», «ԳՐԻԱՐ» ՓԲԸ-ի «Գետիկ-1», «ԱՖԱՄԻԱ» ՍՊԸ-ի «Դաnբաս ՓՀԷԿ-2», «ՄԻՆԱ-ՄԱՅԱ» ՍՊԸ-ի «Եղեգնաձոր ՓՀԷԿ-1», «ԽՈՒՄ» ՍՊԸ-ի «Խում» և «ԱՐԳԻՇՏԻ-1» ՍՊԸ-ի «Մարցիգետ ՓՀԷԿ-2» ՓՀԷԿ-երը պետք է գործարկվեին ավելի ուշ ժամանակահատվածում, սակայն գործարկվել են 2011 թվականին, ուստի կարելի է ասել, որ 26 ՓՀԷԿ-երից գործարկվել է 15 ՓՀԷԿ, այսինքն՝ 58 %-ը:
2012 թվականին ավարտվում են թվով 41 ՓՀԷԿ-երի կառուցման լիցենզիաների գործողության ժամկետները, սակայն, ըստ ներդրողների հայտնած տվյալների, իրատեսական է դրանցից 19-ի գործարկումը:
2004-2011 թթ. ժամանակահատվածում` 8 տարվա ընթացքում, Հայաստանում գործարկվել է 90 ՓՀԷԿ, իսկ 1998-2003 թթ. ժամանակահատվածում` 6 տարվա ընթացքում՝ 17 ՓՀԷԿ: 2004թ. հունվարի դրությամբ հանրապետությունում կառուցման փուլում էին գտնվում 11 ՓՀԷԿ-եր, իսկ 2012 թ. հունվարի դրությամբ կառուցման փուլում են գտնվում 87 ՓՀԷԿ-եր:
2012-2014 թթ. ընթացքում ՀՀ-ում գործարկման ենթակա 87 ՓՀԷԿ-երից 73-ը կհանդիսանան բնական ջրահոսքի վրա կառուցված ՓՀԷԿ-եր: 2015թ. հունվարի դրությամբ բնական ջրահոսքերի վրա գործող ՓՀԷԿ-երի քանակը կկազմի ընդհանուրի մոտ 65%-ը, նրանց հզորությունները կկազմեն ընդհանուրի մոտ 75%-ը, իսկ առաքվող էլեկտրական էներգիան` մոտ 77%ը:
Հանրապետությունում, բացի կառուցման լիցենզիաների համաձայն նոր հզորությունների գործարկումը, արդիականացվում են նաև գործող հզորությունները: Ներկայումս գործող 5 ՓՀԷԿ-երում իրականացվող ներդրումային ծրագրերի արդյունքում սպասվում է, որ կգործարկվի լրացուցիչ 165 կՎտ հզորություն, իսկ նրանց էլեկտրական էներգիայի տարեկան սպասվող արտադրությունը կաճի ավելի քան 7.4 մլն կՎտժ-ով: Այսինքն կարող ենք սպասել, որ 2015 հունվարին հանրապետությունում գործարկված 203 ՓՀԷԿ-երի գումարային հզորությունը կկազմի 365.3 ՄՎտ, որոնք միջին տարեկան հաշվով կառաքեն մոտ 1 մլրդ 229.6 մլն կՎտժ էլեկտրական էներգիա:
