Հարավկորեական ոստիկանության տնօրեն Չո Հյուն Օ-ն ապրիլի 9-ին հրաժարական է տվել իր ենթակաների միջև առաջացած սկանդալի պատճառով: Այս մասին գրում է The Korea Times-ը:
Դեպքը, որի պատճառով ոստիկանության ղեկավարը հեռանում է իր պաշտոնից, տեղի է ունեցել ապրիլի 2-ին:
Ոատիկանություն է զանգահարել Սուվոն քաղաքի մի բնակչուհի, որը պատմել է, որ իր վրա հարձակվել են, ընդ որում, նա մանրամասն բացատրել է, թե կոնկրետ որտեղ է տեղի ունեցել դեպքը:
Սակայն ոստիկանների անփութության ու նրանց աշխատանքների սխալ համակարգվածության պատճառով կնոջը հաջողվել է գտնել միայն 13 ժամ հետո:
Չո Հյուն Օ-ն իր ցավակցություններն է հայտնել զոհվածի ընտանիքին ու ներողություն է խնդրել նրա հարազատներից: Ընդ որում` նա հայտարարել է, որ իր վրա է վերցնում կատարվածի ամբողջ պատասխանատվությունը և իր ենթակաների անգործության հետևանքները:
Հետաքննության ընթացքում պարզվել է, որ թեժ գծի օպերատոր-հեռախոսավարները բավականաչափ գիտելիքներ չունեն այդ աշխատանքի համար ու միայն նրանց 1/5 մասն է անցել նախապատրաստական երկամսյա դասընթացներ:
