Թուրքական Milliyet թերթի փոխանցմամբ՝ Թուրքիայի կառավարությունը, ԱԳՆ-ի և գլխավոր շտաբի մասնակցությամբ, մշակել է «ճգնաժամային սցենար»՝ եթե ձախողվի Սիրիայում տիրող իրավիճակի կարգավորման վերաբերյալ Անանի պլանը: Այս մասին ասել է Անկարայի բարձրաստիճան պաշտոնյաներից մեկը, որը չի հայտնել իր անունը:
Ըստ թուրքական այդ սցենարի՝ Սիրիայիմ՝ Թուրքիային սահմանամերձ տարածքներում ստեղծվելու է «բուֆերային գոտի», և երկու երկրների միջև բացվելու են հումանիտար միջանցքներ, որոնց անվտանգությունը պետք է ապահովեն թուրքական բանակի ստորաբաժանումները:
Այդ ամենը կարող է տեղի ունենալ, եթե Բաշար Ասադի բանակը խոշոր գործողություններ իրականացնի Հալեպի շրջանում և Թուրքիայում գտնվող սիրիացի փախստականների թիվը հասնի 50,000-ի (ներկայիս դրությամբ՝ այդ ցուցանիշը կազմում է 24,500): Վաղը նրանց տեսակցելու է գալիս Սիրիայի հարցով ՄԱԿ-ի և ԱՊԼ-ի հատուկ ներկայացուցիչ նշանակված Քոֆի Անանը:
Հիշեցնենք, որ օրեր առաջ Թուրքիայի վարչապետ Ռեջեփ Էրդողանի գլխավոր խորհրդական Իբրահիմ Քալընն ամերիկյան The Wall Street Journal թերթին տված հարցազրույցի ժամանակ հայտարարել էր, որ եթե Սիրիայում իրավիճակն ավելի վատանա, ապա Թուրքիան կարող է գործի անցնել և Սիրիայի տարածքում ձևավորել բուֆերային գոտի՝ ընդգծելով, որ Թուրքիան արդեն պլանավորել է, թե որտեղ է ստեղծելու այդ գոտին:
Ի դեպ, WikiLeaks-ի կողմից հրապարակվող ամերիկյան STRATFOR հետախուզա-վերլուծական կենտրոնի նամակագրության մեջ նշված է, որ 1998 թվականի հոկտեմբերի 20-ին Ադանայում կնքված թուրք-սիրիական համաձայնագրով Թուրքիան իրավունք ունի 15 կիլոմետր խորությամբ բուֆերային գոտի ձևավորել Սիրիայում:
