Բրիտանական The Independent պարբերականը Գուլիտի համար կազմել է մի ցուցակ, որում ընդգծվում են Լոնդոնի և Գրոզնիի տարբերությունները. լեգենդար հոլանդացին նախկինում մարզել է Լոնդոնի «Չելսի»-ն, իսկ 2011 թվականի հունվարի 18-ից ստանձնել է Գրոզնիի «Թերեք»-ի գլխավոր մարզչի պաշտոնը: The Independent-ի կազմած ցուցակն իր մեջ երեք կետ է պարունակում:
Առաջին հերթին թերթն ուշադրություն է դարձնում Չեչնիայում ալկոհոլի վաճառքի սահմանափակման վրա (հանրապետությունում ոգելից խմիչքների վաճառքը թույլատրված է միայն առավոտյան ժամը 8-10-ը): Նշվում է, որ Լոնդոնում Գուլիտը կարող էր բազմաթիվ ակումբներ ու սրճարաններ այցելել, իսկ Չեչնիայում նրան ալկոհոլ կառաջարկեն միայն մի քանի սրճարաններում, այն էլ` միայն կաշառքով:
Երկրոդ կետում The Independent-ն անդրադառնում է այն պրոբլեմներին, որոնց կարող է հանդիպել Գուլիտի կինը: Ինչպես գրում է բրիտանական հայտնի պարբերականը, կանանց համար վտանգավոր է առանց հիջաբների Գրոզնիում զբոսնելը. Չեչնիայում ամենուր են անչափահասները, որոնք փեյնթբոլի ատրճանակներով կրակում են բոլոր` առանց հիջաբների կանանց վրա:
Երրորդ կետը վերաբերում է քաղաքների գլխավոր պողոտաների անվանումներին: Ինչպես նշում է թերթը, Լոնդոնում դա King’s Road (բառացի թարգմանությունը` «թագավորի ճանապարհ»), իսկ Գրոզնիում Ïроспект Путина (Պուտինի պողոտա): The Independent-ը հատուկ նշում է, որ գլխավոր փողոցն այդպես է կոչել Ռամզան Կադիրովը: Վերջինս այդկերպ փորձել է իր շնորհակալությունը հայտնել Ռուսաստանի վարչապետին Գրոզնիի վերականգնման ֆինանսավորման համար: Հոդվածի հեղինակը հեգնանքով գրում է, որ 2000 թվականին հենց Պուտինի հրամանով ռմբակոծվեց քաղաքը:
Հոդվածում, որ վերնագրված է The worst football transfer in the world (աշխարհի վատագույն տրանսֆերը), Գուլիտի մարզչական կարիերան համարվում է պատմության ամենազարմանալիներից մեկը. «Չելսի»-ում աշխատած մարզիչը համաձայնել է գլխավորել չեչեն «զորավար»-ի ակումբը: