ՌԱՀՀԿ կենտրոնի ղեկավար Ռիչարդ Կիրակոսյանը այսօր հրավիրած քննարկման ժամանակ, անդրադառնալով Թունիսի իրադարձություններին, հայտարարեց, որ դրանք ունեն երեք առանձնահատուկ նշանակություն: Այն, ըստ ՌԱՀՀԿ ղեկավարի, ուղերձ է Ադրբեջանին` հաշվի առնելով այնտեղի կառավարության վիճակը և իշխանության փոխանցումը հորից որդուն: Որպես Հայաստանի համար կարևոր դաս` նա առանձնացրեց իշխանության կողմից հասարակության` փոփոխությունների պահանջի անտեսումը: Նա ասաց, որ Թունիսը Ալժիրի նման իսլամական երկիր չէ, և չէր առանձնանում իսլամական ծայրահեղական տրամադրություններով: ՌԱՀՀԿ ղեկավարի դիտարկմամբ` Թունիսը չի նմանվում նաև արաբական աշխարհի մյուս երկրներին: Նա առանձնացրեց, որ Թունիսում իշխանությունը շատ վստահ էր, և այնտեղ նախագահը, նրա կինն ու մերձավորներն ունեին առավելություններ: Ռիչարդ Կիրակոսյանը հիշեցրեց, որ Թունիսի 74-ամյա նախագահը իշխանությունը իր ձեռքն է վերցրել 23 տարի առաջ կայացած պետական հեղաշրջման արդյունքում: ՌԱՀՀԿ փորձագետն ասաց, թե Թունիսի անվտանգության ուժերն օգնեցին, որ նախագահը լքի երկիրը: Այնուհետև Թունիսի նախագահը ապաստան խնդրեց Ֆրանսիայից, որի գաղութն էր Թունիսը: Բայց երբ Ֆրանսիան մերժեց նրան ապաստան տրամադրելը, Թունիսի նախագահը գնաց Սաուդյան Արաբիա: Համեմատելով Հայաստանը Թունիսի հետ` Ռիչարդ Կիրակոսյանը նշեց, որ այնտեղ էլ, ինչպես մեր երկրում, առկա էր իշխանության և ընդդիմության միջև չհասկացվածություն: «Նրանք նույնպես չհասկացան, որ ակտիվ և առողջ ընդդիմությունը դրական դեր է խաղում»,- ասաց նա: ՌԱՀՀԿ ղեկավարը ասաց, որ Թունիսում կառավարությունը սխալ հաշվարկ կատարեց` փակելով բուհերը: «Շատ ուսանողներ, որոնք դասի էին գնում և չէին մասնակցում ցույցերին, դրանից հետո սկսեցին մասնակցել»,- նկատեց ՌԱՀՀԿ ղեկավարը: Ռիչարդ Կիրակոսյանը նշեց, որ Թունիսի նախագահի հետ երկիրը լքեցին նաև կոռումպացված էլիտայի ներկայացուցիչները: