Հայաստանում Մեծ Բրիտանիայի դեսպան Չարլզ Լոնդեյլի կարծիքով, Հարավկովկասյան տարածաշրջանի երկրներում կա մի սխալ սինդրոմ. համոզմունք, որ հնարավոր չէ համագործակցել երկու տարբեր քաղաքականություն որդեգրած ուժերի հետ: «Այստեղ կարծիքը կա, որ եթե մի կողմը հաղթում է տվյալ իրավիճակում, անպայմանորեն մյուսը պիտի պարտվի: Սա շատ սխալ կարծիք է»,- հավատացած է դեսպանը և այս առումով ողջունում է այն փաստը, որ Հայաստանի համագործակցությունը ՆԱՏՕ-ի հետ չի խանգարում Ռուսաստանի հետ նրա հարաբերություններին: «Սա լավ օրինակ է շատ երկրների համար, որոնք կարծում են, թե պետք է ընտրություն կատարեն այս երկու ուժերի միջև»,-նշում է դեսպանը: Համագործակցության մասին խոսքում Լոնդեյլը հարկ համարեց շեշտել. «Պետություններն իրենք պետք է որոշեն՝ դառնա՞լ ՆԱՏՕ-ի անդամ, թե՞ պարզապես համագործակցել: Մենք չենք ստիպում որևէ երկրի անդամակցել մեզ: Իրենք պիտի ընտրեն` ում վստահել իրենց երկրի անվտանգությունը»: Դեսպանը անդրադարձավ ՆԱՏՕ-ի նոր ռազմավարության. «2010-ը կարևոր տարի էր ՆԱՏՕ-ի համար, քանի որ 2010 թ. նոյեմբերի 19-20-ը Լիսաբոնում կայացած ՆԱՏՕ-ի գագաթնաժողովում մենք ընդունեցիք նոր ռազմավարական հայեցակարգ»: Համաձայն նոր հայեցակարգի, որում ամփոփված է կազմակերպության 10 տարվա անելիքը, ՆԱՏՕ-ն այսուհետ անվտանգության հարցերը լուծելու է՝ ակտիվորեն համագործակցելով այլ երկրների, ԵՄ-ի և ամենակարևորը` Ռուսաստանի հետ: ՆԱՏՕ-ն նաև ընդլայնում է գործունեության ոլորտը. այսուհետ ՆԱՏՕ-ն զբաղվելու է ինչպես ահաբեկչության, էներգետիկ անվտանգության, ատոմային և այլ զենքերի դեմ պայքարի, այդպես էլ քաղաքական անկայունության, և գլոբալ տաքացման խնդիրներով:
