Իրանական Mehr News լրատվական գործակալության փոխանցմամբ`հայտնի է դարձել ԱՄՆ նախագահ Բարաք Օբամայի կողմից Իրանին հասցեագրված գաղտնի ուղերձի բովանդակությունը:
Հիշեցնենք, որ Թուրքիայի վարչապետ Ռեջեփ Էրդողանը վերջերս կատարած իր իրանական այցի ընթացքում Օբամայի ուղերձը փոխանցել էր Իրանի գերագույն ղեկավար ու հոգևոր առաջնորդ, այաթոլլահ Ալի Խամենեիին:
Արևմտյան մի շարք լրատվամիջոցներ հրապարակել են գաղտնի ուղերձի բովանդակությունը: Դրանում Օբաման հայտարարել է, որ ԱՄՆ-ը դեմ չէ խաղաղ նպատակներով Իրանի կողմից միջուկային ծրագրի գործածմանը: Օբաման հավելել է նաև, որ դեմ չէ Իրանի՝ ռազմական բաղադրիչ չպարունակող միջուկային ծրագրի զարգացման շարունակմանը:
The Washington Post թերթն այս կապակցությամբ գրել էր, որ Օբամայի ուղերձից հասկանալի չէ, թե արդյոք Վաշինգտոնը դե՞մ է Իրանի կողմից ուրանի հարստացմանը, ինչն ամենայն հավանականությամբ հայտնի կդառնա օրեր անց Իրանի ու «Վեցյակի» միջև կայանալիք բանակցությունների ժամանակ:
Հիշեցնենք, որ Էրդողանն Իրան էր ժամանել մարտի վերջին Սեուլում տեղի ունեցած միջուկային անվտանգության գագաթնաժողովից անմիջապես հետո: Այս կապակցությամբ Թուրքիայի հիմնական ընդդիմադիր ուժ հանդիսացող «Ժողովրդա-հանրապետական» կուսակցության (ԺՀԿ) առաջնորդ Քեմալ Քըլըչդարօղլուն Էրդողանին անվանել էր Օբամայի սուրհանդակ, իսկ արտգործնախարար Ահմեդ Դավութօղլուին՝ հավատարիմ ծառա՝ նկատի ունենալով, որ Էրդողանի հետ համատեղ մամլո ասուլիսի ավարտից հետո Օբաման մատի շարժումով նրան հրավիրել էր գալ իրենց հետևից: