Թուրքական Konhaber կայքի փոխանցմամբ` Թուրքիայի վարչապետ Ռեջեփ Էրդողանը ապրիլի 7-11-ը պաշտոնական այցով մեկնելու է Չինաստան: Նա առաջինը այցելելու է Սինձյան-Ույղուրական ինքնավար շրջան, ուր բնակվում են թյուրքախոս ույղուրներ:
Ինքնավար շրջանի մայրաքաղաք Ուրումչիում Էրդողանն այցելելու է կառուցվող թուրքական տնտեսական կենտրոն, ինչպես նաև Չինաստանի խոշորագույն մզկիթներից Յանգ Հանգի մզկիթ: Էրդողանը պետք է ելույթ ունենա մզկիթի առջև և ույղուրներին կոչ անի ինտեգրվել չինական հասարակության մեջ և համատեղ կառուցել երկրի ապագան:
Ուրումչիից Էրդողանը կմեկնի Պեկին և կհանդիպի Չինաստանի Պետխորհրդի վարչապետ Վեն Ցզյաբաոի հետ: Ապա նա առանձին հանդիպումներ կունենա Չինաստանի փոխնախագահ Սի Ցզինպինի և պետխորհրդի փոխվարչապետ Լի Կեցինի հետ: Այդ հանդիպումներում կողմերը քննարկելու են երկկողմանի հարաբերությունների հարցն ու փոխադարձ հետաքրքրության կենտրոնում գտնվող տարածաշրջանային և միջազգային հարցեր:
Պեկինում պաշտոնական հանդիպումների անցկացումից հետո Էրդողանն այցելելու է Չինաստանի տնտեսական կենտրոն՝ Շանհայ, ուր մասնակցելու է թուրք-չինական գործարար ֆորումին, որին մասնակցելու են մոտ 300 թուրք գործարարներ ու մի շարք նախարարներ:
Հիշեցնենք, որ վերջին անգամ Թուրքիայի վարչապետը Չինաստան է այցելել 27 տարի առաջ: