Ռուսաստանի ԱԳ նախարար Սերգեյ Լավրովի այցը Հայաստան ցույց տվեց, որ մեր երկիրն ավելի մեծ ռազմավարական արժեք է ձեռք բերել: Այսօր կայացած մամուլի ասուլիսի ժամանակ այս մասին ասաց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը` հավելելով, որ Ռուսաստանը շատ բաներում նման է Թուրքիային, որը Հայաստանին հարգում է, երբ նա ուժեղ է:
«Լավրովի այցը երեք քաղաքական նպատակ ուներ` Ռուսաստանի համար Հայաստանի դերի ցուցադրում, ինչպես նաև Պուտինի նախագահության համար նախապատրաստություն, երկրորդ`Ռուսաստանի դերակատարությունը Հարավային Կովկասում ցույց տալու անհրաժեշտություն, և երրորդ` այց Հայաստան` ԱԺ ընտրություններից մեկ ամիս առաջ:
Ակնհայտ է, որ Հայաստանը ՌԴ-ի համար այս տարածաշրջանում միակ վստահելի գործընկերն է: Ռուսաստանը հասկանում է, որ Հայաստանը իր համար շատ կարևոր գործընկեր է, ինչն էլ մեզ թույլ է տալիս ավելի շատ բան կորզել նրանից:
Միաժամանակ Ռուսաստանը հարաբերությունները բարելավում է Ադրբեջանի հետ, և Վլադիմիր Պուտինի վերադարձով այդ երկիրը շարունակելու է իր առաջնային դերը ԵԱՀԿ Մինսկի խմբի շրջանակներում: Սակայն զարգացումներում ակնհայտ փոփոխություններ են սպասվում: Նախագահ Մեդվեդևը շատ համբերատար էր և հակամարտող կողմերի հանդիպումները կազմակերպելու համար ներդնում էր իր ժամանակն ու ջանքերը, նա սեղմում էր Հայաստանի ու Ադրբեջանի նախագահների ձեռքերը, իսկ Պուտինը սեղմելու փոխարեն՝ կփորձի ջարդել Սարգսյանի ու Ալիևի ձեռքերը:
Պուտինի ոճն ավելի ագրեսիվ ու ճնշող է, սակայն, բարեբախտաբար, չի աշխատի՝ երկու պատճառով: Նախ՝ Պուտինը չի կարող ազդել Հայաստանի վրա, քանի որ լարված հարաբերություններ ունի հայկական կողմի հետ, երկրորդ՝ Հայաստանն ու Ադրբեջանը շատ հեռու են միմյանցից: Ադրբեջանը դեռևս չի գիտակցում, որ հավիտյան կորցրել է ԼՂՀ-ն և պարտվել պատերազմում: Մինչդեռ Հայաստանը ոչ մեկի համար վտանգավոր չէ: Այս առումով հակամարտության կարգավորման շուրջ իրական զարգացումներ չպետք է ակնկալել»,- ասաց նա:
Անդրադառնալով Լավրովի այցին` Հայաստանում ԱԺ ընտրություններին ընդառաջ՝ Ռիչարդ Կիրակոսյանը նկատեց, որ, ընդհանուր առմամբ, Պուտինի նախագահության նոր շրջանի պատրաստություններ են տարվում:
«Պուտինը կվերափոխի քաղաքականությունը, որովհետև Ռուսաստանն էլ է փոխվել: Նա այլևս այնքան սիրված չէ, ինչպես նախկինում, ինչը Հայաստանի համար նշանակում է, որ պետք է դասեր քաղել: Բացի այդ, Հայաստանը պետք է ՌԴ-ից ճնշումներ ակնկալի նաև Պուտինի Եվրասիական միության մասով: Սակայն սա հստակորեն ՀՀ շահերից չի բխում: Հայաստանը պետք է նայի ապագային, ոչ թե վերստեղծի խորհրդային անցյալը»,- ասաց Կիրակոսյանը:
