Իրանական Press TV-ի փոխանցմամբ`Թուրքիայի արտգործնախարար Ահմեդ Դավութօղլուն թուրքական Kanal D հեռուստաալիքին տված հարցազրույցի ժամանակ անդրադարձել է Իրանի միջուկային ծրագրի խնդրին.
«Անհնար է, որ Իրանում չանսան գերագույն ղեկավար և հոգևոր առաջնորդ, այաթոլլահ Ալի Խամենեիի ֆեթվային (հրաման), որով արգելվում է միջուկային զենք ստեղծելն ու գործածելը: Հոգևոր առաջնորդի արձակած ֆեթվան համարվում է պարտադիր յուրաքանչյուր մուսուլմանի համար:
Իրանցի ատոմագետներն ու դիվանագետները երբեք չեն ընտրի միջուկային զենքի ստեղծման ուղին, քանի որ դա կհանդիսանա ոչ միայն քաղաքական սխալ, այլև՝ կրոնական անհնազանդություն»:
Հիշեցնենք, որ փետրվարի 22-ին Խամենեին հայտարարեց, որ Իրանի ժողովուրդը երբեք չի ձգտի միջուկային զենքի ստեղծմանը, քանի որ տիրապետում է բավականաչափ ուժի՝ յուրաքանչյուր հարձակում հետ մղելու համար. «Իսլամի սկզբունքներով՝ միջուկային զենք ստեղծելը համարվում է մեծ մեղք, իսկ միջուկային զենքի տարածումը՝ անիմաստ, կործանարար ու վտանգավոր»:
Խամենեին այս մասին հայտարարեց նաև մարտի վերջերին՝ Թուրքիայի վարչապետ Ռեջեփ Էրդողանի հետ ունեցած հանդիպման ժամանակ: