Նյու Յորքի դաշնային դատարանը ռուս ձեռնարկատեր Վիկտոր Բուտին դատապարտել է 25 տարվա ազատազրկման՝ նրան մեղավոր ճանաչելով դիտավորյալ կերպով ձախծայրահեղական խմբավորումներին, մասնավորապես Կոլումբիայի հեղափոխական զինված ուժերին (FARC), զենք վաճառելու մեջ: Այս մասին հաղորդում է Associated Press-ը:
Դատավոր Շիրա Շեյնդլինը իր դատավճիռը կարդացել է հինգշաբթի երեկոյան: Դատավճռի հրապարակումից առաջ Բուտի փաստաբան Ալբերտ Դայանը հայտարարել է, որ Բուտին դատում են ոչ թե իր հանցագործության, այլ իր խոսքերի համար:
«Դա ճիշտ չէ, այդպես չպետք է լինի այնպիսի հզոր երկրում, ինչպիսին ԱՄՆ-ն է»,- ասել է նա:
Երբ Բուտին վերջին խոսքի հնարավորություն են տվել, ասել է. «Ես մեղավոր չեմ, ես չէի պատրաստվում ինչ-որ մեկին սպանել, ես չէին պատրաստվում ինչ-որ մեկին զենք վաճառել»,- ասել է նա: Բուտի խոսքերով՝ դատարանում նստածները գիտեն, որ ինքը մեղավոր չէ: «Եվ դրանով հանդերձ, նրանք պետք է ապրեն, իրենց երեխաներին մեծացնեն ու սիրեն իրենց կանանց»,- ասել է նա:
Բուտի կինը՝ Ալլան, հայտարարել է, որ ամուսնու դեմ կայացրած դատավճիռը հաղթանակ է համարում: Նրա կարծիքով՝ դրա մասին է վկայում այն հանգամանքը, որ Բուտին 25 տարվա ազատազրկման են ենթարկել, ինչը նվազագույն պատիժն է նման մեղքի համար: Նա նշել է, որ դրա պատճառը նրա դեմ փաստերի բացակայութունն է եղել:
Վիկտոր Բուտը ձերբակալվել է Բանգկոկում 2008 թ. մարտին ամերիկյան հատուկ ծառայությունների կողմից իրականացված գործողության արդյունքում: 2010 թ. նոյեմբերին Թաիլանդի իշխանությունները նրան հանձնեցին ԱՄՆ-ին:
ՄԱԿ-ի և ԱՄՆ իշխանությունների տվյալներով՝ Բուտը և իր գործընկերները ներգրավված են Աֆղանստանին, Անգոլային, Կոնգոյի Ժողովրդավարական Հանրապետությանը, Լիբերիային, Ռուանդային, Սուդանին և Սիերա Լեոնեին անօրինական զենք մատակարարելու մեջ:
