Հայ ազգային կոնգրեսի թիրախն այս ընտրություններին լինելու է ՀՀԿ-ն. այսօր լրագրողների հետ հանդիպմանը ասաց ՀԱԿ անդամ Վահագն Խաչատրյանը:
«Մարդիկ Հանրապետականին չեն վստահում, դրա համար էլ ընտրողների շրջանում նա գործում է վախի մթնոլորտ սերմանելու սկզբունքով: Միաժամանակ, ես երբեք լուրջ չեմ ընդունել ՀՀԿ-ի այն խոսքերը, թե իրենք հայաստանյան քաղաքական դաշտում գործող ամենահզոր ուժն են: Երբ կուսակցությունը ստիպում է այս կամ այն հիմնարկից իր օգտին կոնկրետ թվով քվեներ ապահովել, նշանակում է՝ այնտեղ մարդու նկատմամբ հարգանք չկա: Իսկ ՀԱԿ-ի համակիրները ազատ են, մեզ մոտ՝ ՀՀԿ-ի նման, մարդկանց ձու ու գինի չեն բաժանում»,- ասաց նա:
Անդրադառնալով ընտրությունների վերահսկման միասնական շտաբ ստեղծելու մասին ՀԱԿ-ի, ՀՅԴ-ի, ԲՀԿ-ի ու «Ժառանգության»՝ երեկ ստորագրած հայտարարությանը՝ Վահագն Խաչատրյանը նշեց, որ փաստաթուղթը թույլ կտա վեր հանել և բացահայտել բոլոր ընտրախախտումները:
«Ես տեսնում եմ դրա հնարավորությունը: Պարզապես շտաբի մեջ ներգրավված ուժերը պետք է միմյանց վստահեն, կոնկրետ քայլերի դիմեն: Այդ պարագայում ընտրությունների ընթացքի վերահսկողությունը լիովին հնարավոր կդառնա:
Ես համոզված եմ, որ զուտ քաղաքական նպատակներից ելնելով՝ հայտարարությունը ստորագրած բոլոր չորս ուժերը ազնիվ համագործակցության դեպքում ընտրություններին հաղթելու ավելի մեծ հնարավորություններ կունենան և չեն գնա իշխանությունների հետ ինչ-ինչ գործարքների:
Միաժամանակ, թող պարզունակ չհնչի, սակայն քաղաքականության մեջ ոչինչ բացառել չի կարելի»,- ասաց Վահագն Խաչատրյանը:
Ամփոփելով՝ ՀԱԿ անդամը հռետորական հարց հնչեցրեց՝ ինչո՞ւ իշխանություններն ընտրություններից հետո չեն համաձայնում հրապարակել ընտրացուցակները: «Պարզ է՝ ինչու: Դրանց հրապարակայնացման դեպքում ընտրակեղծիքներն ակնհայտ կդառնան»:
Հիշեցնենք, որ խորհրդարանական ընտրություններին մասնակից չորս քաղաքական ուժերի՝ Հայ ազգային կոնգրեսի, Դաշնակցության, «Ժառանգության» և «Բարգավաճ Հայաստան»-ի ներկայացուցիչները երեկ ստորագրել են մի հայտարարություն, որով հայտնում են ընտրությունների վերահսկման միասնական շտաբ ստեղծելու մասին: Հայտարարությանը չի միացել միայն այդ համատեղ քննարկմանը մասնակցած ՀՀԿ-ն:
