Բելառուսական իշխանությունները տեղեկացրել են «Մինտրանսին» ու «Բելավիային», որ ապրիլի 13-ից ռուսական ավիաընկերությունները դեպի Մինսկ կկարողանան իրականացնել օրական միայն 4 չվերթ` նախկին 5-ի փոխարեն: Այս մասին հայտնում է «Կոմերսանտը»:
Պարբերականի աղբյուրի տվյալով, որը ծանոթ է Մոսկվայի ու Մինսկի միջև միջկառավարական բանակցությունների ընթացքին, ապրիլի 3-ին Բելառուսի կապի և հաղորդակցության նախարարության ավիացիայի դեպարտամենտը «Մինտրանսին» և «Ռոսավիացիային» է ուղարկել վերջնագրային բնույթի նամակ` ապահանջելով կրճատել ավիաթռիչքները:
Հրատարակության զրուցակիցը պնդում է, որ Մոսկվան պետք է անձամբ որոշի` որ ընկերությունից «վերցնի» 1 չվերթը: Բոլոր ավիափոխադրողները, որոնք աշխատում են այդ գծի վրա` «Աերոֆլոտ» (օրական 3 թռիչք), «Սիբիր» և «ՅուԹեյր» (օրական մեկական թռիչք), արդեն ստացել են նմանատիպ բովանդակությամբ նախազգուշական հեռագրեր:
Մինչ այդ, սակայն, «Մինտրանսում» պարբերականի թղթակցին վստահեցրել են, որ «սահմանված կարգով չեն ստացել ոչ մի նամակ», սակայն «Աերոֆլոտը» հաստատել է, որ բելառուսական ավիաղեկավարությունից ստացել են հեռագիր:
Մոսկվայի և Միսկի միջև ավիահաղորդակցությունը դադարեցվել էր մարտի 26-ի առավոտյան: Պատճառն այն էր, որ կողմերը չէին կարողացել համաձայնության գալ թռիչքների քանակի վերաբերյալ: Ավելի ուշ թռիչքները թույլատրվել էին մինչև մարտի 29-ը:
Մարտի վերջին Ռուսաստանի և Բելառուսի ավիացիոն ղեկավարությունները պայմանավորվել էին հաստատել սահմանված կարգով թռիչքները մինչև 2012 թ. մայիսի 10-ը:
