Առաջին ամերիկացի ծովային հետևակայինների խումբը ժամանել է Ավստրալիա՝ համաձայն այս երկրում մինչև 2017 թվականը 2,5 հազարանոց զորք տեղակայելու որոշման: Այս մասին հաղորդում է France-Presse գործակալությունը:
The New York Times-ի տվյալներով` Դարվին քաղաքի շրջան են ժամանել 180 ամերիկացի զինվորականներ: Նրանք կտեղակայվեն ավստրալիական Ռոբերտսոն-Բերրեքս ռազմական բազայում:
Զինվորականներն Ավստրալիայում կմնան ռոտացիայի սկզբունքով: Սեփական ռազմակայան Վաշինգտոնը մտադիր չէ ստեղծել:
Մարտի վերջին The Washington Post-ը հաղորդում էր, որ ԱՄՆ-ը հավանական է համարում Կոկոսյան կղզիներից անօդաչու սարքեր բաց թողնելու հնարավորությունը: Ինչպես նշվում է հոդվածում, Ավստրալիան ևս կարող է Պերտում իր ռազմական հնարավորություններն ընդլայնել, որպեսզի այն կարողանան օգտագործել ամերիկացի զինվորականները:
Ավստրալիայում ամերիկյան ռազմական ուժերի տեղակայումն իրականանում է ԱՄՆ-ի նոր ռազմական քաղաքականության շրջանակներում, որը մշակել է Բարաք Օբաման:
Ըստ դրա` նախատեսվում է ուժերը կենտրոնացնել հատկապես Հարավարևելյան Ասիայում: ԱՄՆ–ը մտադիր է ընդլայնել ռազմական համագործակցությունը Ֆիլիպինների, Սինգապուրի, Թայլանդի, Ինդոնեզիայի, Վիետնամի, Մալազիայի հետ: Այս կերպ Վաշինգտոնը փորձում է հավասարակշռել Չինաստանի ազդեցությունը տարածաշրջանում: