Միջազգային քրեական դատարանը (ՄՔԴ) մերժել է Պաղեստինի ինքնավարությանը՝ վերանայել Իսրայելի դեմ հայցը,- գրում է իսրայելական Haaretz-ը:
Պաղեստինի ինքնավարության ղեկավարությունը 2011 թ. հուլիսին դատական հայց էր ներկայացրել Միջազգային քրեական դատարան՝ պահանջելով քննել 2008-2009 թթ. Գազայի հատվածում ռազմական գործողությունների ժամանակ Իսրայելի զինված ուժերի կողմից իրականացված ռազմական հանցագործությունները:
Սակայն ՄՔԴ-ն որոշել է, որ իրենք իրավասու չեն քննել պաղեստինյան տարածքներում իրականացված հանցագործությունների մեղադրանքները: Այդ որոշումը պատճառաբանվում է այն հանգամանքով, որ Պաղեստինն առայժմ ՄԱԿ-ի լիիրավ անդամ չէ, հետևաբար ՄՔԴ իրավասությունները չեն տարածվում նրա վրա:
2011 թ. սեպտեմբերին Պաղեստինի ղեկավարությունը, որն այս պահին ՄԱԿ-ում ունի դիտորդի կարգավիճակ, պահանջեց կազմակերպությունից ճանաչել անկախ Պաղեստին պետությունը: Սակայն ՄԱԿ-ի Անվտանգության խորհրդում Պաղեստինի կարգավիճակի շուրջ այդպես էլ միասնական որոշում չկայացվեց:
ՄՔԴ-ն սակայն չի բացառել, որ ապագայում կարող է վերադառնալ Իսրայելի դեմ պաղեստինյան կողմի հայցին:
