Մինսկի 11-ամյա բնակչուհին ապրիլմեկյան անհաջող կատակի պատճառով բերման է ենթարկվել ոստիկանություն: Նա փորձել է ընկերուհուն ուղարկել քրեական բովանդակությամբ SMS հաղորդագրություն, սակայն հեռախոսահամարը շփոթել է:
Մինսկի ժամանակով գիշերը 3.50-ին «Ես թաղել եմ դիակը, հաջորդն ի՞նչ պետք է անել» բովանդակությամբ հաղորդագրությունը ստացել է Մինսկում բնակվող մի կին: Ընթերցելով տարօրինակ հաղորդագրությունը՝ նա արթնացրել է ամուսնուն: Վերջինս էլ որոշել է այդ մասին տեղեկացնել ոստիկանությանը:
Lenta.ru-ի փոխանցմամբ` 10 րոպե անց ոստիկանները նրանց տանն էին: Նրանք ճշտել էին հաղորդագրությունն ուղարկողի հեռախոսահամարը, ազգանունն ու հասցեն և գնացել նրա հետքերով:
Ոստիկանների առջև դուռը բացել է մի տղամարդ, որը տեղյակ չի եղել կատարվածի մասին: Հարցաքննության ժամանակ պարզվել է, որ հաղորդագրությունն ուղարկել է նրա դուստրը: Նա ցանկացել է չար կատակ անել մեկ տարի առաջ ԱՄՆ տեղափոխված իր ընկերուհու հետ: Ժամանակային տարբերության պատճառով աղջիկը հաղորդագրությունն ուղարկել է գիշերը և պառկել քնելու:
Միջադեպի առիթով քննություն է տարվում: Արկածախնդիր դեռահասի ծնողներին վարչական տույժ է սպասվում:
