Սվազիլենդի թագավոր Մսվատի 3-րդը հրամայել է իր ենթականերին, որ ծննդյան օրվա կապակցությամբ իրեն անասուններ նվիրեն:
Իր 44-րդ տարեդարձը Մստավի 3-րդը տոնելու է ապրիլի 19-ին՝ Շիսելվենի շրջանում:
«Շիսելվենի իշխանությունների ներկայացուցիչները, որպես տոնակատարության տերեր, պետք է անասուններ հավաքեն, որը զոհաբերվելու է: Շրջանի իշխանությունները հասկանում են իրենց կարևոր դերը, որովհետև հենց իրենք են հյուրընկալելու թագավորին՝ նրա կյանքի այդ հիշարժան օրը»,- նշել է ներքին գործերի նախարար արքայազն Գկոկոման:
Մսվատի 3-րդը համարվում է աշխարհի 15 ամենահարուստ միապետերից մեկը: Forbes ամսագիրը նրա կարողությունը գնահատել է ավելի քան 100 մլն դոլար: Նա ունի 13 կին, որոնցից յուրաքանչյուրն ապրում է առանձին պալատում:
Միաժամանակ Սվազիլենդը հանդիսանում է աշխարհի ամենաաղքատ երկրներից մեկը: Տեղի բնակչության 60 %-ը օրական 2 դոլարով է ապրում:
