Ադրբեջանական Turan լրատվական գործակալության փոխանցմամբ՝ ԱՄՆ-ն Ադրբեջանին, Ռուսաստանին և Չեռնոգորիային կոչ է արել առավել կոշտ միջոցներ ձեռնարկել լրագրողների պաշտպանությունն ապահովելու և նրանց վրա հարձակում գործածների պատժի խնդիրը լուծելու համար: Այս մասին հայտարարել է ԵԱՀԿ-ում ԱՄՆ-ի ներկայացուցիչ Յան Կելին.
«Մեր գլխավոր մտահոգությունը ԵԱՀԿ-ի տիրույթում լրագրողների դեմ գործադրվող բռնությունների և ահաբեկումների շարունակումն է: Մենք խորապես անհանգստացած ենք Ադրբեջանում անկախ լրագրողների և մասնավորապես «Ազատություն» ռադիոկայանի ադրբեջանական ծառայության թղթակից Հաջիջա Իսմայիլովայի դեմ տարվող կամպանիայից:
Մենք Ադրբեջանի իշխանություններին կոչ ենք անում մանրամասն հետաքննել դա և պատժել մեղավորներին: Մենք ողջունում ենք այն փաստը, որ Ադրբեջանի կառավարությունը քրեական գործ է հարուցել այդ կապակցությամբ»:
Հիշեցնենք, որ մարտի 8-ին Իսմայիլովան իր տան հասցեով նամակ էր ստացել, որում ինտիմ լուսանկարներ և սպառնալիքներ էին։ Նամակում մասնավորապես նշված է եղել, որ եթե իրեն լավ չդրսևորի, ապա իրենք նրան խայտառակ կանեն:
Դրանից հետո Իսմայիլովան հայտարարել էր, որ իր համար անակնկալ չի եղել այդպիսի շանտաժը, քանի որ իր լրագրողական գործունեությունը վաղուց անհանգստացնում է կառավարությանը: Նա հիշեցրել էր, որ երկար ժամանակ է, ինչ իրականացնում է լրագրողական հետաքննություն նախագահ Իլհամ Ալիևի ընտանիքի անդամների գաղտնի բիզնեսի շուրջ՝ վեր հանելով ամենաբարձր մակարդակի կոռուպցիոն փաստեր: