Մաշտոցի պուրակի կրպակները ապամոնտաժող բրիգադի անդամներից Տիգրան Խզմալյանը դիմեց ոստիկաններին՝ ասելով մենք կանգնած են այն բուտիկի առջև, որը պատրաստվում ենք ապամոնտաժել առաջին հերթին: Նա հորդորեց ոստիկաններին հավաքվել հենց այն բուտիկի առջև, որի մոտ կանգնած են ապամոնտաժող բրիգադի անդամները՝ ասելով, որ այդ հայտարարությունը հենց նրանց համար է:
«Մենք տեսանք, որ ոստիկաններին օգտագործում են ինչպես շղթայված շների՝ մի քանի հաստափոր, հաստավիզ օլիգարխի բուտկա պահպանելու համար: Ես հասկանում եմ, որ դա բոլորովին ձեզ հաճույք չի պատճառում, ես դա ձեր աչքերից եմ հասկանում, տեսնում եմ նաև այն, որ դուք ամաչում եք, իսկ ամոթը այն բանն է, որը մարդուն տարբերում է կենդանուց: Շնորհակալություն, որ ամաչում եք, բայց դա, իհարկե, քիչ է: Հույս ունենք, որ դուք, երբ երդում եք ընդունում մինչ ոստիկան դառնալը, երդվում եք ծառայել հանրությանը, ոչ թե մի քանի գող ու ավազակների: Ձեզ համար ամոթ է, որ ձեզ վազեցնում են մեր ետևից»,- ասաց Խզմալյանը:
Այս պահին ակցիային են միացել մի շարք հասարակական քաղաքական հեռուստատեսային գործիչներ, այդ թվում՝ դերասան Հովհաննես Ազոյանը:
